न्युयोर्कमा अत्यावश्यक बाहेकका कामदारलाई काममा जान अप्रिल १५ सम्म रोक

खसोखास अमेरिका ब्यूरो

---

प्रकाशित मिति : चैत्र १६, २०७६ आईतबार

न्युयोर्कमा अत्यावश्यक बाहेकका कामदारलाई काममा जान अप्रिल १५ सम्म रोक लगाइएको छ । अत्यावश्यक बाहेकका अन्यले अप्रिल १५ सम्म घरबाटै काम गर्न सक्नेछन् ।

न्युयोर्कका गभर्नर एन्ड्रयु कुमोले अप्रिल १५ सम्मका लागि ‘पज’ लम्बाउने घोषणा गरेका हुन् । सीडीसीले न्युयोर्क, न्युजर्सी र कनेक्टिकटका बासिन्दालाई ट्राभल एड्भाइजरी जारी गरेको भोलिपल्ट कुमोको घोषणा आएको हो ।

यी तीन राज्यमा ७० हजारभन्दा धेरैमा कोरोना संक्रमण पुष्टी भएको छ भने मृतकको संख्या १२ सय नाघेको छ ।

कुमोले आइतबार दिउसो पज अवधि लम्बाउने घोषणा गरेका हुन् । जसमा विजनेशहरु खोल्न प्रतिबन्ध लगाइएको छ भने जमघट हुनमा समेत रोक लगाइएको छ ।

न्युयोर्क राज्यमा मात्र मृतकको संख्या एकहजारको नजिक पुगिसकेको छ । न्युयोर्कमा बिरामीहरु अस्पतालमा भर्ना हुने दर पनि शनिबार बढेको थियो ।

सीडीसीले न्युयोर्क, न्युजर्सी र कनेक्टिकटका बासिन्दाहरुलाई १४ दिन अन्य राज्यमा अत्वाश्यकबाहेकका यात्रा नगर्न यात्रा सुझाव जारी गरेको छ । ट्रम्पले न्युयोर्कलाई क्वारेन्टाइन गर्ने बताएपनि सीडीसीले भने यात्रा सुझावमात्र जारी गरेको हो ।

न्युयोर्कमा नियम नमाने ५ सय जरिवाना

न्युयोर्क सिटीमा सामाजिक दुरी कायम नगर्नेहरुलाई ५ सय डलर जरिवाना गरिने भएको छ । न्युयोर्कका मेयर बिल डे ब्लाजिओले कोरोना भाइरसको महामारीबिरुद्ध लड्न सामाजिक दुरी कायम गर्न नमान्नेहरुलाई ५ सय डलर जरिवाना गरिने बताएका छन् ।

जरिवानाको रकम २५० डलरदेखि ५ सय डलरसम्म हुने बताइएको छ । मेयरले भनेका छन् तपाईहरुलाई बारम्बार चेतावनी दिइएको छ । यदि कसैले सुन्दैन भने त्यो व्यक्ति जरिवानाको भागिदार हुनेछ ।

मेयर ब्लाजिओले सिटीका पार्कहरु र खेलमैदानहरु भने खुला नै राख्ने बताएका छन् । न्युयोर्क सिटीमामात्र कोरोना संक्रमितको संख्या ३२ हजार नाघेको छ भने मृतकको संख्या ६७८ पुगेको छ ।

अमेरिकाभर सामाजिक दुरीको नियम अप्रिल ३० सम्म

यसैबीच अमेरिकी राष्ट्रपति डोनाल्ड ट्रम्पले अमेरिकाभरका लागि सामाजिक दुरी कायम गर्नुपर्ने गाइडलाइनलाई अप्रिल ३० सम्मका लागि लम्बाउने घोषणा गरेका छन् । कोरोना संक्रमण फैलिन नदिन अप्रिल ३० सम्मका लागि सामाजिक दुरीको नियम कायम राख्ने उनले बताएका छन् ।

आगामी दुईसाता मृत्युदर उच्च हुने र त्यसपछि जुन १ सम्म मुलुक रिकभरको बाटोमा जाने ट्रम्पले बताएका छन् । जुन १ सम्म धेरै राम्रा कामहरु हुने उनले बताएका छन् ।