न्युयोर्कमा अधिकारको सेन्सस सप्ताह सुरु, सेन्सस भर्न आउनेलाई मास्क र सेनिटाइजर
प्रकाशित मिति : श्रावण १०, २०७७ शनिबार
अमेरिकामा नेपाली र नेपालीभाषी आप्रवासीहरुको हकहितका लागि कृयाशिल गैर नाफामुलक संस्था अधिकारले आजदेखि सेन्सस सप्ताह सुरु गरेको छ । आज न्युयोर्कको रिजउड नेपाली समाजसँगको सहकार्यमा रिजउडमा कार्यक्रम गरिएको थियो ।
जुलाई २६ मा घ्याल्सुम्दो सेवा संस्थासँगको सहकार्यमा एल्महस्र्टमा कार्यक्रम गरिने छ भने जुलाई २७ मा ज्याक्सनहाइट र एल्महस्र्टमा सेन्ससको पोष्टर टाँस्ने कार्यक्रम रहेको छ । त्यस्तै जुलाई २८ मा अधिकार नेल सलोन कामदारका लागि बु्रकलिनमा कार्यक्रम गरिदैछ ।
जुलाई २९ मा नेल सलुन संचालकका लागि उडसाइडमा र जुलाई ३० मा ज्याक्सनहाइटको डाइभर्सिटी प्लाजामा कार्यक्रम गरिनेछ । सेन्सस सप्ताहको अन्तिम दिन जुलाई ३१ मा लायन्स क्लब आफ क्वीन्स नेपलिजसँगको सहकार्यमा कोरोनामा कार्यक्रम गरिदैछ ।
सेन्सस भर्न आउनेहरुलाई मास्क र ह्याण्ड सेनिटाइजर निशुल्क उपलब्ध गराउने अधिकारले जनाएको छ । न्युयोर्कमा सेन्ससको रेस्पोन्स दर जम्मा ५८ प्रतिशत रहेको अवस्थामा अधिकारले सप्ताहव्यापी कार्यक्रम सुरु गरेको हो ।
अमेरिकामा नेपालीहरुको संख्या झण्डै ३ लाख अनुमान गरिएपनि जनगणनाममा भने निकै कम संख्या देखिएको छ । अमेरिकामा झण्डै डेढलाख नेपालीहरु ग्रिनकार्ड वा नागरिकतावाहक रहेका छन् । त्यो बाहेक इमिग्रेशन आवेदनहरु पेन्डिङ अवस्थामा रहेका र कागजपत्रविहिनहरुको संख्या पनि उल्लेख्य छ ।
अमेरिकाको सरकारी साधनश्रोत र सुविधामा पहुँचका लागि तथा संघीय सरकारबाट विनियोजन हुने अरबौं डलरमा सही हिस्साका लागि जनगणना महत्वपूर्ण मानिन्छ । त्यसमा नेपालीहरुको संख्या उल्लेख्य देखिएमा नेपाली र नेपाली अमेरिकनहरुलाई स्वास्थ्य, शिक्षा लगायतका साधनश्रोत र सुविधामा पहुच कायम हुनेछ ।
