१८२ पटक रक्तदान गरेका अर्जुन मैनालीको बायोग्राफी ११ भाषामा प्रकाशित हुँदै
प्रकाशित मिति : श्रावण ३१, २०७७ शनिबार
१८२ पटक रक्तदान गरिसकेका न्युयोर्क निवासी प्रेरणादायी व्यक्तित्व अर्जुन मैनालीको बायोग्राफी ११ भाषामा प्रकाशित हुने भएको छ । १२० पृष्ठको उक्त पुस्तक आगामी साता सार्वजनिक हुने जनाइएको छ ।
एउटै पुस्तकमा नेपाली, मैथिली, थारु, तामाङ, नेपाल, मगर, लिम्बु, गुरुङ, शेर्पा, संस्कृत र अँग्रेजी भाषामा बायोग्राफी प्रकाशित हुने भएको छ । ब्लड डोनर्स एशोसिएशन नेपालले प्रकाशन गर्ने उक्त पुस्तकको सम्पादन मचाकाजी महर्जनले गरेका छन् ।
मैनाली पहिलोपटक सन् १९८७, अगस्त २० मा १९ बर्षको उमेरमा रक्तदान गरेका थिए । पहिलोपटक रक्तदान गरेकै मितिमा पुस्तक प्रकाशन हुन लागेको हो । त्यसयताका झण्डै ३३ बर्षमा मैनालीले १२५ पटक होल ब्लड र ५७ पटक प्लेटलेसगरी १८२ पटक रक्तदान गरिसकेका छन् ।
मैनालीले ६ वटै महादेशका १७ वटा देशहरुमा पुगेर रक्तदान गरेका छन् । उनले रक्तदानकै लागि सबैभन्दा लामो २२ घण्टाको न्युयोर्कदेखि सिड्नीसम्मको हवाईयात्रा गरेका थिए । अमेरिकाका विभिन्न १४ राज्यमा पुगेर उनले रक्तदान गरेका छन् ।
अर्जुन मैनालीले रक्तदानको क्षेत्रमा गरेको योगदानको कदरमा ओयस्टर बे टाउनले अर्जुन मैनाली डे आयोजना गरेर सम्मान समेत गरेको थियो । न्युयोर्कमा मैनाली विश्व रक्तदाताका रुपमा चर्चित रहेका छन् ।