अमेरिकी नागरिकका मंगेतरहरुका लागि भिसा जारी गरिने, म्याद सकिएकाले पनि पुन: आवेदन दिन नपर्ने
प्रकाशित मिति : भाद्र १५, २०७७ सोमबार
अमेरिकी नागरिकका विदेशमा रहेका मंगेतरहरुका लागि अमेरिकी दूतावास वा कन्सुलेटबाट स्थानीय अवस्था र साधनश्रोतले साथ दिएसम्म ‘के’ भिसा जारी गरिने अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । आज एक सुचना जारी गर्दै अमेरिकी विदेशमन्त्रालयले के भिसा जारी गरिने स्पष्ट पारेको हो ।
नियमित भिसा प्रकृया सुरु नभएको अवस्थामा समेत मंगेतरहरुले भिसा पाउनसक्ने जनाइएको छ । तर त्यसका लागि आफ्नो नजिकको अमेरिकी दूतावास वा कन्सुलेटमा सम्पर्क गर्न सुझाव दिइएको छ । राष्ट्रपति ट्रम्पको कार्यकारी आदेशबाट ‘के’ भिसा प्रभावित भएको छैन ।
‘के’ भिसाका लागि आई १२९ आवेदन सामान्यतया ४ महिनाका लागि अद्यावधिक हुने भएपनि ४ महिनाभन्दा बढीको अवधि आवश्यक परेमा कन्सुलर अधिकारीहरुले पुनमूल्यांकन गर्ने जनाइएको छ । कोरोनाको महामारीका कारण नियमित भिसा सेवा अवरुद्ध भएकाले म्याद गुज्रिएका आई १२९ का सन्दर्भमा सामान्यतया नयाँ फाइल गर्न नपर्ने जनाइएको छ ।
के हो मंगेतर भिसा ?
यदि तपाई अमेरिकी नागरिकताप्राप्त व्यक्ति हुनुहुन्छ भने तपाईले आफ्नो विदेशमा रहेको मंगेतरलाई अमेरिकामा बोलाएर विवाह गर्न सक्नुहुनेछ । ‘के वान’ नामको यो भिसाले तपाईको मंगेतरलाई अमेरिकामा आउनमा अनुमति प्रदान गर्छ तर यसरी आउने व्यक्तिले अमेरिकामा रहेको आफ्नो मंगेतरसँग ९० दिनभित्र विवाह गरिसक्नुपर्छ ।
सामान्यतया मंगेतरका रुपमा अमेरिका आउने व्यक्ति र झिकाउने व्यक्तिबीच विगत २ बर्षभित्र भौतिक रुपमा नै भेट भएको हुनुपर्छ । तर विवाह अगाडि नै भेट्ने संस्कार नहुनेहरुको सन्दर्भमा भने अमेरिकी सरकारले उक्त कठिनायीको आधारमा भिसा स्वीकृत गर्नसक्छ ।
कसरी दिने आवेदन ?
यो भिसामा मंगेतरलाई अमेरिकामा ल्याउनका लागि अमेरिकी सरकारको युएससीआईएसमा फर्म आई १२९ एफ भरेर आवेदन दिनुपर्छ । यो फर्म अमेरिकी दूतावास, कन्सुलेट वा युएससीआईएसका विदेशमा रहेका कार्यालयमा भर्न मिल्दैन ।
फर्म उचित शुल्क र कागजातसहित यो ठेगानामा पठाउनुपर्छ ।
यो आवेदन दिएपछि जब युएससीआईएसले तपाईको आवेदन स्वीकृत गर्छ, त्यसपछि केसलाई नेशनल भिसा सेन्टर समक्ष पठाउँछ । नेशनल भिसा सेन्टरले तपाईलाई केस नम्बर उपलब्ध गराउनुका साथै आवेदनलाई सम्बन्धित देशको दूतावासमा पठाउँछ ।
नेशनल भिसा सेन्टरबाट अन्तरवार्ताको तयारीका लागि पत्र आइसकेपछि डीएस १६० फर्म भर्नुपर्छ । त्यसपछि अन्तरवार्तामा जाँदा डीएस १६० भरेर अनलाइनमार्फत पेश गरेको कन्फर्मेशन, अद्यावधिक पासपोर्ट, जन्मदर्ता प्रमाणपत्र, पुलिस रिपोर्ट, स्वास्थ्य परिक्षण, फर्म आई १३४ भरेको स्पोन्सर, २ वटा तस्वीर, अमेरिकी नागरिक मंगेतरसँगको सम्बन्धको प्रमाण र तोकिएको शुल्क लिएर दूतावास वा कन्सुलेटमा जानुपर्छ । कागजातहरु अँग्रेजी भाषामा वा अँग्रेजीमा अनुवाद गरेर नोटरी गरिएको हुनुपर्छ ।
भिसा स्वीकृत भइसकेपछि ६ महिनाभित्र अमेरिका
भिसा स्वीकृत भइसकेपछि कन्सुलर अफिस वा अमेरिकी दूतावासले भिसाका साथमा एउटा बन्द गरिएको प्याकेट समेत दिन्छ । यो प्याकेट नखोलीकनै अमेरिका आउने क्रममा अमेरिकाको विमानस्थलमा आइसकेपछि अध्यागमन अधिकारीहरुलाई बुझाउनुपर्छ । सामान्यतया मंगेतर भिसा ६ महिनाको हुने भएकाले ६ महिनाभित्र अमेरिका प्रवेश गरिसकेको हुनुपर्छ ।
अमेरिका आइसकेपछि अमेरिकी सरकारले तोकेको निकायमा कानुनी विधिपूर्वक विवाह गर्नुपर्छ । विवाह गरिसकेपछि अमेरिकी नागरिकता हुने दम्पत्तिले ग्रिनकार्ड आवेदन आई ४८५ आवेदन फाइल गर्नुपर्छ । त्यसपछि उक्त आवेदन स्वीकृत भइसकेपछि ग्रिनकार्ड प्राप्त हुन्छ ।