कुलमानको पुर्ननियुक्तीको माग गर्दै अमेरिकामा नेपालीहरुको प्रर्दशन
प्रकाशित मिति : आश्विन १, २०७७ बिहीबार
नेपाल बिद्युत प्राधिकरणका निर्वतमान कार्यकारी प्रमुख कुलमान घिसिङको पुनःनियुक्तीको माग गर्दै अमेरिकामा नेपालीहरुले बिरोध प्रर्दशन गरेका छन् । अमेरिकाको न्यूयोर्कस्थित ज्याक्शन हाइटमा जम्मा भएर गैरआवासीय नेपालीहरुले कुलमानले पुनः निरन्तरता पाउनुपर्ने माग राखेका हुन् ।
प्ले कार्ड सहित उपस्थित भएका नेपालीहरुले हाम्रो होइन राम्रो मान्छेलाई पुर्ननियुक्ती दे, उज्यालो नेपालका अभियान्ताले निरन्तरता पाउनु पर्छ, कुलमान जिन्दावाद, जनताको चाहना कुलमानको निरन्तरता लगायतका नारा समेत लगाएका थिए ।
आदिवासी जनजाती महासंघले आयोजना गरेको कार्यक्रममा उपस्थितहरुले नेपाललाई अन्धकारबाट उज्यालोमा लैजाने कुलमानले पुर्ननियुक्ती पाउनुपर्ने धारणा राखेका छन् । यस्तै आफ्नो मातृभूमी नेपाल अब अन्धकार मुक्त हुन कुलमानले निरन्तरता पाउनै पर्ने उनिहरुको माग थियो । कार्यक्रममा स्थानिय संघ सस्थाका प्रतिनिधिहरुको समेत उलेख्य सहभागिता रहेको थियो ।
महासंघका अध्यक्ष लोक चेम्जोङले ओली सरकारले जनताको चाहना बुझेर तुरुन्त पुर्ननियुक्ती दिनुपर्ने धारणा राखे । उनले राम्रो काम गर्ने कर्मचारीलाई निरन्तरता दिन संबिधान र कानुनले समेत नछेक्ने भन्दै यस्तो माग राखेका हुन् ।
चार बर्षे कार्यकाल सकेर प्राधिकरणबाट भर्खरै अवकास पाएका निवर्तमान कार्यकारी प्रमुख घिसिङले निरन्तरता पाउनुपर्ने भन्दै यतीखेर सामाजिक संजाल र सडकहरुमा सरकारका बिरुद्धमा नाराबाजी भाईरहेका छन् ।