नागरिकता लगायतका आवेदनमा शुल्क बढाउनमा युएससीआईएसलाई अदालतको रोक
प्रकाशित मिति : आश्विन १४, २०७७ बुधबार
अमेरिकी सरकारको युएससीआईएसले अक्टोबर २ शुक्रबारदेखि अमेरिकी नागरिकता लगायतका कैयन आवेदनमा शुल्कबृद्धि गर्न लागेकोमा अदालतमा रोक लगाएको छ । संघीय न्यायाधिसले प्राथमिक निरोधक आदेश जारी गर्दै युएससीआईएसलाई शुल्कबृद्धिमा रोक लगाएका हुन् ।
प्राथमिक निरोधक आदेश कार्यान्वयनमा रहँदासम्म युएससीआईएसले नयाँ शुल्क लागु गर्न नपाउने भएको छ । सरकारले नाइन्थ सर्किट कोर्टबाट शुल्कबृद्धिको नियम कार्यान्वयको माग गर्दै पुनरावेदन गर्ने भएको छ ।
मंगलबार नर्दन डिस्ट्रिक्ट अफ क्यालिफोर्नियाका न्यायाधिस जेफरी ह्वाइटले नयाँ शुल्कबृद्धि कार्यान्वयनमा रोक लगाएका हुन् । न्यायाधिसको आदेश देशब्यापी रुपमा लागु हुनेछ ।
युएससीआईएसले अमेरिकी नागरिकता लगायतका आवेदनमा गरेको शुल्कबृद्धि अक्टोबर २ बाट लागु गर्ने योजनामा रहेको थियो ।
हालसम्म अमेरिकी नागरिकता आवेदन एन ४०० का लागि अनलाइन आवेदन शुल्क ६४० रहकोमा ५२० डलर बढाएर ११६० बनाइएको छ । कागजीरुपमा फाइल गर्नेहरुले भने ११७० डलर तिर्नुपर्नेछ । अहिलेको प्रावधान अनुशार नागरिकता आवेदन कागजी रुपमा फाइल गर्नका लागि कम आम्दानी हुनेलाई ३२० डलर र अरुलाई ६४० डलर शुल्क रहेकोमा अब सबैले ११७० डलर तिर्नुपर्नेछ ।
आफन्तका लागि ग्रिनकार्ड आवेदन आई १३० फाइल गर्दा अहिलेसम्म ५३५ डलर शुल्क रहेकोमा नयाँ शुल्क अनलाइन फाइल गर्दा ५५० डलर र कागजी फाइल गर्दा ५६० तय गरिएको छ । ग्रिनकार्डको आवेदन आई ४८५ को शुल्क भने १० डलर कम गरेर ११३० तय गरिएको छ । गैरआप्रवासी भिसा थप वा स्टाटस परिवर्तनका लागि अहिलेसम्म ३७० डलर रहेकोमा नयाँ शुल्क अनलाइनबाट फाइल गर्दा ३९० र कागजी रुपमा फाइल गर्दा ४ सय तोकिएको छ ।
वर्क परमिटको शुल्क बढाइएको छैन तर बायोमेट्रिक शुल्क घटाइएको छ । बायोमेट्रिक शुल्क ८५ डलरबाट घटाएर ५५ डलर बनाइएको छ तर डाकाका लागि बायोमेट्रिक शुल्क ८५ डलर नै यथावत राखिएको छ । आई१४० आवेदनको शुल्क पनि घटाइएको छ । अहिले यो शुल्क ७ सय डलर रहेको छ तर नयाँ शुल्कमा २४५ डलर घटाएर ५५५ डलर कायम गरिएको छ ।
यसअगाडि एसाइलम आवेदन आई ५८९ फाइल गर्न निशुल्क रहेकोमा नयाँ नियम अनुशार ५० डलर शुल्क तोकिएको छ । अन्तिम नियममा अनलाइन आवेदन दिनका लागि प्रोत्साहन गरिएको छ । अनलाइन आवेदन दिनेहरुका लागि शुल्क समेत कागजी आवेदनका तुलनामा कम गरिएको छ ।
