कोरोना महामारीमा २२ पटक रक्तदान
प्रकाशित मिति : मंसिर २५, २०७७ बिहीबार
– अर्जुन मैनाली
कोरोना संक्रमण महामारी को रुपमा विश्वब्यापी रुपमा फैलिदा करोडौ मानिसहरु बिरामी भए। लाखौंले जीवन गुमाए ।
यस्तो अवस्थामा मानिसहरु डराएर घरभित्रै बस्न थाले । पूर्व निर्धारित रक्तदान कार्यक्रमहरु रद्द भए । रगतको आपूर्ति घट्यो । अस्पातालमा बिरामीहरुले रगत पाउन सकेनन् ।
यस्तैबीचमा न्यूयोर्क ब्लड सेन्टरले बिरामीहरुको लागि रगत र रक्त तत्व एकदमै कम भएको भन्दै मलाई ईमेल पठाइरहे । उनीहरुले सामाजिक दुरी राख्दै मास्क लगाएर सुरक्षित तरिकाले रक्तदान गर्न सकिन्छ भन्न थाले । अमेरिकन रेडक्रस रक्त सेवाले पनि त्यस्तै भने ।
मलाई पनि यस्तै महामारीको बेलामा झन बढी रक्तदान गर्नु पर्छ भन्ने लाग्यो । त्यसैले अप्रिल २४ मा अमेरिकन रेडक्रस,फार्मिङ्गटन,कनेक्टिकटमा रक्तदान गरेँ । घर फर्केपछी आज मैले रक्तदान गरेँ नि भनेर श्रीमतीलाई भनेँ । समुदायका मानिसहरुलाई पनि रक्तदान गर्न हौसला होस भनेर सामाजिक सन्जालमा रक्तदान गर्दै गर्दाको फोटो राखेँ । रक्तदान कार्यक्रम आयोजना गर्न सक्ने सम्भावित संघ संस्थालाई यस्तो महामारीकाबीच मैले रक्तदान गरेको ईमेल लेखेँ ।
श्रीमती केही डराइन् । तर मैले सम्झाउदै रक्तदान गर्दैमा कोरोना सर्दैन भनेर बुझाउन प्रयास गरेँ । त्यसपछी हरेक दुई तीन हप्तामा न्यूयोर्क ब्लड सेन्टरमा गएर प्लेटलेटस दान गर्न थालेँ ।
जुन २६ मा प्रवासी नेपाली एकता मञ्चका अध्यक्ष टेक गुरुङले फोन गर्दै रक्तदान कार्यक्रम आयोजना गर्न लागेको जानकारी दिनुभयो । उहाँहरु र ब्लड बैङ्कलाई समन्वय गराएँ । रक्तदान कार्यक्रममा आवश्यक खर्चको लागि २ सय डलर सहयोग गरेँ । त्यसपछिका ५ महिनाको अबधिमा बिभिन्न ८ वटा नेपाली संघसंस्थाले न्यू योर्कमा रक्तदान कार्यक्रम राखे । यी सबै रक्तदान कार्यक्रममा सहभागी भएँ ।
करिब ६ सय जना नेपालीहरुले रक्तदान गरे । रक्तदान गर्ने धेरैजसोले रक्तदान गरेका फोटोहरु सामाजिक सन्जालमा राखे ।
न्यूयोर्कमा यि कामहरु हुँदै गर्दा नेपालमा पनि रगत संकलन एकदमै कम भई रहेको थियो । कोरोना नफैलियोस भनेर नेपाल सरकारले बिभिन्न कार्यालयहरु बन्द गर्दै जनताहरुलाई घर भित्रै बस्न भनेको थियो ।
अस्पतालका बिरामीहरुलाई रगत उपलब्ध गराइ राख्न ब्लड डोनर्स एसोसिएसन नेपालले हरेक दिन रक्तदान कार्यक्रम राखेको थियो । मैले पनि रक्तदान कार्यक्रममा आबश्यक खर्चको लागि ५० हजार रुपैया सहयोग पठाएँ । तीन महिनाको अबधिमा १ सय वटा रक्तदान कार्यक्रम गर्दा ६ हजार २ सय ७२ युनिट रगत संकलन भएछ । यसै गरी रक्तदान कार्यक्रम गरी रहनु भनेर फेरी २५ हजार थप सहयोग पठाएँ ।
कोरोना महामारीका बेला काठमाण्डौमा लक डाउन हुँदा बेरोजगार मजदुरलाई सामुहिक खाना खुवाउने कार्यक्रममा काठमाण्डौ महानगरपालिका २९ नम्बरका वडा सदस्य अर्जुन बहादुर श्रेष्ठमार्फत दशहजार रुपैया सहयोग पठाएँ । त्यसैताका बाजुरामा र हुम्लाका गरिव ब्यक्तिहरुलाई खाध्यान्न बितरण गर्ने कार्यक्रममा बाजुराका प्रकाश सिंह मार्फत दश दशहजार रुपैया सहयोग पठाएँ ।
काठमाण्डौको हाम्रो लाइफ बैङ्कलाई १५ हजार रुपैया सहयोग गरेँ । बाजुरामा रक्तदाता संस्था गठन गर्न लक्ष्मीराज पाण्डेमार्फत दशहजार रुपैया सहयोग पठाएँ । त्यसै गरी बैतडीमा पनि रक्तदाता संस्था गठन गर्न र जिल्ला अस्पातलसँग मिलेर सम्भाबित युवाहरुको रक्तसमुह परिक्षण गर्न तृप्ति शाहीमार्फत बिसहजार रुपैया सहयोग पठाएँ ।
रक्तदान सम्बन्धी मेरा हरेक गतिबिधि जाजरकोटका जनक केसीलाई थाहा रहेछ । उनले पनि आफ्नो जिल्लामा रक्तदान उत्प्रेरणा कार्यक्रम गर्न इच्छा राखे । बिगतमा जाजरकोटमा रगत अभावमा सुत्केरी तथा बिपन्न समुदायका नागरिकहरुले जीवन गुमाउनु परेको समाचार आएका थिए । त्यस क्षेत्रका युवाहरुमा रक्तदान गराउन उत्प्रेरणा कार्यक्रम गर्नैपर्ने थियो । जनक केसीसँग मिलेर म रक्तदान गर्नेछु बिषयमा जाजरकोटका माध्यामिक बिद्यालयहरुमा निबन्ध प्रतियोगिता गराउन ६० हजार रुपैया सहयोग पठाएँ । डिसेम्बर ७ मा सयौँ विद्यार्थीको उपस्थितिमा १६ जना विद्यार्थीहरुले निबन्ध प्रतियोगितामा भाग लिएछन्। भविष्यमा रक्तदाताहरुको संख्यामा उल्लेख्य बृद्धि गर्न र रक्तदान जस्तो पवित्र काममा युवा पुस्तालाई यो प्रतियोगिताले प्रेरित गर्छ जस्तो लाग्यो ।
रक्तदान गरेर अरुको जीवन बचाउने संसारकै पवित्र काम हो भन्ने सन्देश दिन सकेँ। नेपाल रेडक्रस सोसाइटी जाजरकोट शाखाका सभापति हरिबहादुर बस्नेतले रक्तदान बढाउनका लागि महत्वपूर्ण सहयोग र चासो राखेको भन्दै मलाई धन्यवाद दिए ।
यता न्यू योर्कमा कोरोना महामारीका बेलामा रक्तदान कार्यक्रम आयोजना गर्ने संस्थाका अध्यक्षहरुलाई वर्ल्ड ब्लड डोनर अवार्डबाट सम्मान गरेँ । वर्ल्ड ब्लड डोनर अर्जुन मैनाली संस्थाको अध्यक्षका हैसियतले समाजमा राम्रा काम गर्नेलाई सहयोग र सम्मान गर्न पाउनु पनि मेरो लागि ठूलै अवशर थियो ।
यसरी महामारीको यो ९ महिनाको अबधिमा २१ पटक रक्तदान गरें । जसमा तीनपटक होल ब्लड र अठारपटक प्लेट्लेट्स दान गरेको थिएँ । रक्तदान कार्यक्रम गर्न सहयोग गरेँ । रक्तदान उत्प्रेरणाको लागि सहयोग गरेँ ।
१ पटक रक्तदान गर्न जाँदा झण्डै ४ घण्टा समय लाग्दो रहेछ । त्यस हिसाबले २१ पटक दान गर्दा ८४ घण्टा र ८ वटा रक्तदान कार्यक्रममा ५ घण्टाका दरले ४० घण्टा सहित कोरोना महामारीबीच १२४ घण्टा बिताएको छु । यो समय, साधन श्रोत र रक्तदानबाट समुदायका धेरै बिरामीहरुलाई बचाउन सकिएको छ । धेरै खुशी लागेको छ ।