न्युयोर्कमा नेपालीमा कोरोना संक्रमण भटाभट, स्वास्थ्यस्थीति सामान्य
प्रकाशित मिति : माघ १६, २०७७ शुक्रबार
न्युयोर्कका नेपालीमा कोरोना संक्रमणदर फेरी बढेको छ ।
न्युयोर्कमा पछिल्ला केहीसातामा कोरोना संक्रमण हुने नेपालीहरुको संख्यामा उल्लेख्य बृद्धि देखिएको छ । न्युयोर्कमा रहेका नेपालीहरुले उल्लेख्यमात्रामा सामाजिक सञ्जालहरुमा आफू कोरोना संक्रमित भएका विवरणहरु पोष्ट गरेका छन् ।
न्युयोर्कमा चिसो बढ्दै गर्दा संक्रमित हुने नेपालीहरुको संख्या पनि उल्लेख्य देखिएको हो । न्युयोर्क र न्युजर्सीमा रहेका कैयन नेपालीहरुले कोरोना संक्रमण भएको बताएपनि कोहीपनि सिकिस्त भएका खबर भने आएका छैनन् ।
न्युयोर्कमा गतबर्षको मार्चदेखि मेसम्म कोरोना संक्रमणबाट झण्डै एकदर्जन नेपालीहरुको ज्यान गएको थियो । कैयन नेपालीहरु सिकिस्त बिरामीभएर अस्पतालको इमर्जेन्सीमा भर्ना हुनुपरेको थियो ।
पछिल्लो चरणमा कोरोना महामारीलाई सहज रुपमा लिने क्रम बढिरहँदा नेपालीहरुमा संक्रमणदर उच्च देखिएको हो । कतिजना नेपालीहरु संक्रमित भएका छन् भन्ने यकिन तथ्यांक नभएपनि सामाजिक सञ्जालहरुमा देखिएका विवरणबाट नेपालीहरुमा उच्च संक्रमण देखिएको आकलन गरिएको छ ।
सुरुका चरणमा नेपालीहरुले आफूलाई संक्रमण भएको सार्वजनिक रुपमा बताउन हिचकिचाउने गरेपनि अहिले भने सामाजिक सञ्जालबाट जानकारी दिन थालेका छन् । केहीदिन अगाडि कोरोना संक्रमित भएका प्रवासी नेपाली एकता मञ्च अमेरिकाका अन्तर्राष्ट्रिय समन्वय परिषद् सदस्य राधाकृष्ण देउजा अहिले क्वारेन्टीनमा रहेका छन् ।
त्यस्तै प्रवासी नेपाली एकता मञ्च अमेरिकाकै बरिष्ठ उपाध्यक्ष यम मोक्तानले आफूलाई कोरोना संक्रमण भएको सामाजिक सञ्जालबाट जानकारी दिएका छन् ।
न्युयोर्कबाहिर पनि न्युजर्सी लगायत अन्य राज्यमा बस्ने नेपालीहरुले पनि आफूलाई कोरोना संक्रमण भएको उल्लेख्यमात्रामा सामाजिक सञ्जालहरुमा उल्लेख गरेका छन् । अमेरिका निवासी लेखक तथा साहित्यकार शेखर ढुंगेलले आफूलाई कोरोना संक्रमण भएको सामाजिक सञ्जालमार्फत जानकारी दिएका छन् ।