बाइडेन प्रशासनबाट ग्रिनकार्डमा ट्रम्पकालिन पब्लिक चार्जको नियम कार्यान्वयन गर्न बन्द
प्रकाशित मिति : फाल्गुन २६, २०७७ बुधबार
बाइडेन प्रशासनले कम आम्दानी हुनेहरु र सरकारी सुविधा लिनेहरुलाई ग्रिनकार्डमा कडाई गर्ने तथा रोक लगाउने ट्रम्पकालिन पब्लिक चार्जको नियम कार्यान्वयन गर्न बन्द गरेको छ । होमल्याण्ड सेक्युरिटीका सेक्रेटरी अलेहान्द्रो मेयरकासले पब्लिक चार्जको नियम लागु गर्न मंगलबारदेखि नै रोकिसकिएको बताएका छन् ।
मंगलबारमात्रै सर्वोच्च अदालतले पब्लिक चार्जको नियम कार्यान्वयनका पक्षमा पर्ने मुद्दाहरु खारेज गर्नका लागि बाइडेन प्रशासनको अनुरोधलाई स्वीकार गरेको थियो । सर्बोच्चले गतमहिनामात्रै पब्लिक चार्जको नियममा पुन सुनुवाईका लागि सहमति जनाएको थियो ।
लगत्तै मंगलबार डिपार्टमेन्ट अफ जस्टिसले देशभरका अदालतहरुलाई सुचित गर्दै ट्रम्पकालिन पब्लिक चार्जको नियमको प्रतिरक्षा नगर्ने सुचित गरेको हो । सन् २०१९ को पब्लिक चार्जको नियम अमेरिकाको मूल्य मान्यता विपरित भएको मेयरकासको भनाई छ ।
अब ग्रिनकार्डका आवेदनकले आत्मनिर्भरता फर्म आई ९४४ भर्नु नपर्ने भएको छ । युएससीआईएसले उक्त फर्म वेवसाइट र प्रणालीबाटै हटाइसकेको छ ।
पब्लिक चार्जको नियम अनुशार अमेरिकामा स्वास्थ्य, आवास र खाद्यान्नका लागि सरकारी सुविधा लिएका र लिने सम्भावना भएकालाई ग्रिनकार्डमा कडाई गरिदै आएको थियो । गतमहिना राष्ट्रपति जो बाइडेनले पब्लिक चार्जको नियमको पुनरावलोकनका लागि आदेश दिएका थिए ।
जस्टिस डिपार्टमेन्टको कदम लगत्तै सातौं सर्किट कोर्टले पब्लिक चार्जको नियम लागु गराउनका लागि भएको पुनरावेदन खारेज गरिदिएको छ । बाइडेन प्रशासनले अब पब्लिक चार्जका सन्दर्भमा क्लीन्टनकालिन नियम लागु गर्ने भएको छ ।
सन् १९९९ को अन्तरिम निर्देशिका अनुशार सरकारले साधारण मेडिकेड, आवास, फुड स्ट्याम्प लगायतका खाद्य सुविधालाई ग्रिनकार्डको निर्धारकका रुपमा पब्लिक चार्जका रुपमा नलिने उल्लेख छ । त्यस्तै कोरोनाबिरुद्धको भ्याक्सिन र उपचारलाई पनि पब्लिक चार्जमा गणना नगरिने स्पष्ट पारिएको छ ।
