‘सम्मान गर्नुहोस् घृणा होइन’: नेपाली र एसियनमाथिको आक्रमणबिरुद्ध न्युयोर्कमा प्रदर्शन
प्रकाशित मिति : चैत्र ७, २०७७ शनिबार
नेपाल आदिवासी जनजाति महासंघ अमेरिकाको आयोजना र एसियन अमेरिकन कम्युनिटी इम्पावरमेन्टको सहआयोजनामा न्युयोर्कको ज्याक्सनहाइटमा रहेको डाइभर्सिटी प्लाजामा नेपालीहरुसहित एसियन समुदायका तर्फबाट प्लेकार्डसहित प्रदर्शन गरिएको छ । अमेरिकामा पछिल्लो समयमा एसियनहरुमाथि बढेका घृणा अपराधकोविरुद्ध उक्त प्रदर्शन गरिएको हो ।
क्यालिफोर्नियामा नेपाली उबर चालकमाथि दुब्र्यबहार भएको घटना सेलाउन नपाउँदै न्युयोर्कमा नेपाली लिफ्ट चालकमाथि हातपातको घटना भएको छ । यस्ता घृणा अपराधका बिरुद्ध प्रदर्शनको आयोजना गरिएको नेपाल आदिवासी जनजाति महासंघ अमेरिकाका अध्यक्ष लोक चेम्जोङले जानकारी दिए ।
कार्यक्रममा वक्ताहरुले नेपाली र एसियनमाथि भइरहेका घृणा अपराधको निन्दा गरेका थिए । स्थानीय राजनीतिज्ञहरु समेत सहभागी उक्त कार्यक्रममा नेपालीहरुले चालकबिरुद्धको हिंशा बन्द गर, सम्मान गर्नुहोस् घृणा होइन लगायतका प्लेकार्डहरु बोकेका थिए । केही नेपालीहरुले विगत दुईमहिनादेखि न्युयोर्कबाट हराइरहेका नेपाली विद्यार्थी अजय शाहको खोजीका लागि दबाबमुलक प्लेकार्ड बोकेका थिए ।
उक्त कार्यक्रमका केही तस्वीरहरु ।
