‘फाइल अ क्लेम’ देख्दैमा बेरोजगारी विमाको नयाँ आवेदन नदिनुहोस्
प्रकाशित मिति : चैत्र १५, २०७७ आईतबार
आफ्नो अनलाइन एकाउन्टमा ‘फाइल अ क्लेम’ को विकल्प देख्दैमा बेरोजगारी विमाको नयाँ आवेदन दिन आवश्यक नहुने न्युयोर्क डिपार्टमेन्ट अफ लेवरले जनाएको छ । तपाईको बेरोजगारी बिमा सुविधाको एकबर्षको अन्तिम म्याद आएको भएमा अनलाइन एकाउन्टमा ‘फाइल अ क्लेम’ विकल्प देख्न सक्नुहुनेछ ।
विमा सुविधाको एकबर्षे मिति हरेकका लागि यो विकल्प प्रदान गरिएको हुन्छ । तर तपाईले स्वरोजगारबाहेकको कामबाट बेरोजगारी विमाको साप्ताहिक दरभन्दा १० गुणा बढी आम्दानी गर्नुभएको छ भनेमात्र नयाँ आवेदन दिनुपर्ने र सामान्यतया अरुले नपर्ने डिपार्टमेन्ट अफ लेवरको भनाई छ ।
यदि तपाईले ‘फाइल अ क्लेम’ विकल्पमार्फत नयाँ आवेदन दिनुभएको छ भने तपाईले त्यसको अन्तिम निर्णय प्राप्त गर्नका लागि दुईदेखि तीनसातासम्म लाग्नसक्छ । स्वीकृत भएको खण्डमा तपाईले नयाँ सुविधा बर्षसहित बेरोजगारी विमा रकम पाउनुहुनेछ । अस्वीकृत भएको खण्डमा पुरानै आवेदन अनुशार रकम प्रदान गरिनेछ ।
तपाईले गतबर्ष फाइल गरेको बेरोजगारी विमाको आवेदनको सुविधा अन्त्य हुने मिति आएको देखेर नयाँ विमा आवेदन दिनुभयो तर तपाईले डिपार्टमेन्ट अफ लेबरको निर्देशिका अनुशार फाइल गर्नु नपर्ने वा नगरेपनि हुने थियो भने के हुन्छ ? यसबारे न्युयोर्क डिपार्टमेन्ट अफ लेवरले स्पष्ट पारेको छ ।
तपाईको अनलाइन एकाउन्टमा नयाँ आवेदनका लागि विकल्प दिइएको भएतापनि तपाई नयाँ आवेदन दिनुनपर्ने श्रेणीमा पर्नुभएको खण्डमा आवेदन दिन आवश्यक छैन । तपाईले पुरानै आवेदनबाट नियमित रकम प्राप्त गर्नुहुनेछ । केबल साप्ताहिक रुपमा प्रमाणिकरण गरे पुग्छ ।
तर तपाईले आफूले नयाँ आवेदन दिनु पर्ने वा नपर्ने थाहा नभएका कारण नयाँ आवेदन दिनुभएको खण्डमा तपाईको नयाँ आवेदन डिपार्टमेन्ट अफ लेबरले २ देखि ३ साताभित्र प्रकृयामा लैजाने जनाएको छ । यदि तपाई नयाँ आवेदनका लागि अयोग्य भएको डिपार्टमेन्ट अफ लेबरले ठहर गरेका आत्तिनु पर्दैन । तपाईले पुरानो आवेदनकै आधारमा साप्ताहिक प्रमाणिकरण गरेमात्र बेरोजगारी विमाको साप्ताहिक रकम प्राप्त गर्नुहुनेछ ।
नयाँ आवेदन कस्ले दिने? कस्ले नदिने ?
गतबर्ष तपाईले बेरोजगारी विमा आवेदन दिइसकेपछि काममा फर्कनुभएको छैन वा नयाँ काम सुरु गर्नुभएको छैन भने तपाईको नियमित बेरोजगारी विमा आवेदनको मिति समाप्त भएको भएतापनि नयाँ आवेदन दिनु नपर्ने न्युयोर्क डिपार्टमेन्ट अफ लेवरले स्पष्ट पारेको छ । आवेदन दिएयता काममा नफर्केकाहरुले केबल साप्ताहिक रुपमा प्रमाणिकरण गरेमात्र बेरोजगारी विमा बापतको रकम आगामी सेप्टेम्बर पहिलो सातासम्म प्राप्त गर्नेछन् ।
तर यदि कसैले आवेदन दिन चाहन्छ भने पुन आवेदन दिनसक्ने न्युयोर्क डिपार्टमेन्ट अफ लेवरको भनाई छ । नयाँ आवेदन प्राप्त भइसकेपछि स्वत बेरोजगारी बिमा रकमका लागि योग्य हुने नभई नयाँ दावी पुनरावलोकन गरिने समेत जनाइएको छ । नयाँ दावीका लागि योग्य हुने ग्यारेन्टी नहुने भएकाले काममा नफर्केकाहरुलाई नयाँ आवेदन नदिन र नियमित साप्ताहिक प्रमाणिकरण गर्न सुझाव दिइएको छ ।
त्यस्तै बीचको कुनै समयमा वा पार्टटाइम काममा फर्केको व्यक्तिले पनि गतबर्ष आवेदन दिएयता आवेदकले पाउने साप्ताहिक बेरोजगारी बिमा रकमको १० गुणा बढी आम्दानी गरेको छैन भने नयाँ आवेदन दिनु नपर्ने न्युयोर्क डिपार्टमेन्ट अफ लेवरले स्पष्ट पारेको छ । उनीहरु बीचको कुनै समयमा वा पार्टटाइम काममा फर्केको भएतापनि नयाँ आवेदन नदिई केबल साप्ताहिक रुपमा प्रमाणिकरण गरेमात्र सेप्टेम्बरसम्म रकम पाउनेछन् ।
तर १० गुणा बढी आम्दानी नगरेको व्यक्तिले पनि आवेदन दिन चाहन्छ भने पुन आवेदन दिनसक्ने न्युयोर्क डिपार्टमेन्ट अफ लेवरको भनाई छ । नयाँ आवेदन प्राप्त भइसकेपछि स्वत बेरोजगारी बिमा रकमका लागि योग्य हुने नभई नयाँ दावी पुनरावलोकन गरिने समेत जनाइएको छ ।
विगतमा आवेदन दिएपछि बीचको अवधिमा काममा फर्केको वा पार्टटाइम काम गरेको व्यक्तिको आम्दानी साप्ताहिक सुविधा रकम भन्दा १० गुणा बढी रहेको छ भने त्यस्ता व्यक्तिले भने अनिवार्य आवेदन दिनुपर्छ ।
त्यस्तै न्युयोर्कमा महामारी बेरोजगारी सहायता पीयुए पाइरहेकाहरुले एकबर्ष नाघेपछि पनि अर्को आवेदन दिनु नपर्ने भएको छ । उनीहरुले एकबर्षको अवधि नाघेपछि पनि साप्ताहिक रुपमा प्रमाणिकरण गरेमात्रै प्राप्त गर्नुपर्ने रकम पहिलेकै तरिकाले पाउने छन् ।
उदाहरणका लागि कोही व्यक्तिले गतबर्ष २०२० को मार्च १४ बाट पीयुए प्राप्त गरिरहेको छ र उसको सुविधा लिने मिति आगामी मार्च २१ मा समाप्त हुने उल्लेख छ भने उसले रकम पाउनका लागि मार्च २१ पछि अर्को आवेदन दिनु नपर्ने भएको छ ।
यदि साप्ताहिक प्रमाणिकरण गर्ने बेलामा आवेदकलाई कोरोनासँग सम्बन्धित प्रश्नहरु सोधिएको छ भने उक्त व्यक्तिले पीयुए रकम पाइरहेको हुन्छ । तर यदि साप्ताहिक प्रमाणिकरण गर्दा सोधिने प्रश्नहरु कोरोना सम्बन्धित छैनन् भने उसले नियमित बेरोजगारी विमा रकम पाइरहेको बुझ्नुपर्छ । महामारीको बेलामा बेरोजगार भएका सबै स्वत पीयुए अन्तरगत नपर्ने डिपार्टमेन्ट अफ लेवरको भनाई छ ।