ओहायो कार दुर्घटनामा घाइते २४ बर्षका सुविन वास्तोला आईसीयुमा, गोफण्डमीमा सहयोग जुटाइदै
प्रकाशित मिति : चैत्र १५, २०७७ आईतबार
ओहायोमा कार दुर्घटनामा घाइते सुविन वास्तोलाको आईसीयुमा उपचार भइरहेको छ । एत्ना टाउनसिपमा गत बिहिबार दिउसो भएको कार दुर्घटनामा वास्तोला गम्भिर घाइते भएका थिए । उनको माउन्ट क्यारामेल इस्ट अस्पतालमा उपचार भइरहेको छ ।
भक्तपुर नेपाल स्थायी घर भएका बास्तोला हालैमात्र बोष्टनबाट ओहायोको ब्ल्याकलिकमा बसाई सरेका थिए । ओहायो स्टेट युनिभर्सिटीमा सुरक्षा र खुफिया विषयमा अध्ययनरत उनी आगामी डिसेम्बरमा ग्रयाजुएट हुदै थिए । पढाइसकेर काममा जाँदै गर्दा उनको गाडीलाई दिउसो २ बजेर ५० मिनेटमा गलत दिशाबाट आएको अर्को गाडीले ठक्कर दिएको थियो ।
दुर्घटनामा उनको टाउको र पिठ्युमा गम्भिर चोट लागेको थियो । साथै फोक्सोमा पनि गम्भिर असर परेको र अहिले भेन्टिलेटरमा राखिएको जनाइएको छ । उनका बुबाआमा अमेरिकामा नै रहेको र अहिले सबै काम छाडेर छोराकै हेरचाहमा लागिरहेको जनाइएको छ ।
उपचार र परिवारलाई सहयोगका लागि अहिले गोफण्डमीमा सहयोग संकलन सुरु गरिएको छ । ४० हजार डलर लक्ष्यसहित सुदर्शन वास्तोलाका तर्फबाट किरण संग्रौलाले सुरु गरेको गोफण्डमीमा अहिलेसम्म ६ हजार ६ सय डलर संकलन भएको छ ।
तपाईपनि सहयोग गर्न चाहनुहुन्छ भने यहाँ क्लीक गर्नुहोला ।
१८ बर्षका टिनएजर माइलो जोन्सनले चलाएको टोयटा क्याम्री गाडीले बाटोको सेन्टर लाइन पार गरेर २४ बर्षका सुविनले चलाएको हुण्डाई गाडीलाई ठक्कर दिएको थियो । त्यसपछि जोन्सनले चलाएको गाडी २१ बर्षका हले होजले चलाएको गाडीमा ठोक्किएको थियो । त्यसबाट उछिटिएको गाडीको टुक्रा क्याथलिन पेरीले चलाएको गाडीमा ठोकिएको थियो ।
घटनामा ४ वटै गाडीका चालकहरु घाइते भएकोमा सुविन र जोन्सनको अवस्था गम्भिर रहेको छ भने अरु दुईजना सामान्य घाइते भएका छन् । जोन्सनले चलाएको गाडीबाट उछिटिएका इडुवार्डो रेइसको गत बुधबार मृत्यु भएको छ ।
