पोर्चुगलबाट नेपाल जान हिडेका ११ नेपालीको टिकट नक्कली, टिकट बेच्ने एनआरएनए नेता निलम्बित
प्रकाशित मिति : चैत्र २४, २०७७ मंगलबार
भोलिपल्ट नेपाल पुग्ने आशामा लगेज बोकेर पोर्चुगलको एयरपोर्ट पुगेका ११ जना नेपालीले आफू ठगिएको त्यतीबेला थाहा पाए, जतिबेला एयरलाईन्सका कर्मचारीले उनीहरुको टिकट नक्कली भएको जानकारी दिए । बोर्डिङ पास लिने बेलामा ती नेपालीहरुले आफूले रकम तिरेर लिएको टिकट नक्कली भएको थाहा पाएका थिए ।
गैर आवासीय नेपाली संघ एनआरएनए पोर्चुगलका कोषाध्यक्ष विक्रमजंग कुँवर संचालन गरेको लक्ष्मी ट्राभलले ती नक्कली टिकट बेचेको थियो । कुँवरको ट्राभलमार्फत पोर्चुगलबाट नेपाल जान ११ जनाले काटेको हवाई टिकटसहित विमानस्थलमा बोर्डिङ पासका लागि अनुरोध गर्दा डेस्कमा रहेका कर्मचारीले टिकट नक्कली भएको जानकारी दिएपछि उनीहरु फिर्ता भएर गुनासोसहित ट्राभलको ढोकामा पुगेका थिए ।
फर्काइएका ११ जनाले प्रतिव्यक्ति ६२० यूरो अर्थात् करिब रु ७० हजार तिरेर टर्किस एयरलाइन्सको टिकट काटेको भक्तपुर घर भई पोर्चुगल बस्दै आएका पीडित विजय धिमालले बताएको समाचार नेपाली लिंकले प्रकाशित गरेको छ । सञ्चालकले ठगेको भन्दै पीडितहरुले पोर्चुगाली प्रहरीमा रिपोर्ट गरेपछि प्रहरीले छापा मारेको छ । प्रहरीले ट्राभलमा रहेका कागजपत्रहरु पनि जफत गरेको छ ।
सञ्चालक कुँवरले भने आफ्नो एजेन्सीलाई टिकट जारी गर्ने निकाय कालो सूचीमा परेकोले समस्या आएको बताएका छन् । पोर्चुगलमा अवस्थित नेपाली संघ संगठनहरुले पीडितलाई न्याय दिलाउन माग गर्दै समाजको नेतृत्व गर्ने व्यक्तिबाट यस्ता क्रियाकलाप हुनु घोर आपत्तिजनक रहेको बताएका छन् ।
यसैबीच एनआरएनए पोर्चुगलले नक्कली हवाई टिकट बेच्ने संघका कोषाध्यक्षलाई निलम्बन गरेको छ । नक्कली हवाई टिकट बेचेको घटना सार्वजनिक भएलगत्तै संघले कोषाध्यक्ष विक्रमजंग कुँवरलाई पदबाट निलम्बन गरेको हो ।