देशनिकालाको आदेश नमान्ने कागजपत्रविहिनलाई अब आइसले जरिवाना नगर्ने
प्रकाशित मिति : बैशाख ११, २०७८ शनिबार
देशनिकालाको आदेश पाइसकेपछि पनि अमेरिका नछाडेका कागजपत्रविहिनलाई अब इमिग्रेशन एण्ड कस्टम इन्फोर्समेन्ट आइसले जरिवाना जारी नगर्ने भएको छ । अमेरिका नछाडेका कागजपत्रविहिनलाई हजारौं डलर जरिवाना गर्ने ट्रम्पकालिन नीतिलाई उल्टाउँदै आइसले जरिवाना जारी नगर्ने घोषणा गरेको हो ।
आइसले कागजपत्रविहिनलाई जरिवाना सम्बन्धि ट्रम्पकालिन दुईवटा नीतिहरु त्यागेको हो । आइसले पहिले नै जरिवाना जारी गरेका कागजपत्रविहिनको उक्त जरिवाना समेत खारेज गर्ने जनाएको छ । ट्रम्पकालिन अध्यागमनबारेका कडा नीतिहरु उल्टाउने क्रममा आइसले यो कदम चालेको हो ।
आइसले गत जनवरी २० देखि नै जरिवाना जारी गर्न छाडेपनि शुक्रबार यो नीतिलाई औपचारिकता दिइएको हो । आइसले ट्रम्पको राष्ट्रपतिकालमा सन् २०१८ को डिसेम्बरदेखि कैयन कागजपत्रविहिनलाई जरिवानाको आशय सहितको सुचना पठाउन सुरु गरेको थियो । ट्रम्पले अमेरिका नछाडेका कागपत्रविहिन र अमेरिकामा कागजपत्रविहिनलाई बस्नका लागि सहजिकरण गर्नेहरुबाट जरिवाना अशुल गर्नका लागि कार्यकारी आदेश जारी गरेका थिए ।
२० बर्षभन्दा लामो समयदेखि अमेरिका नछाडेका कागजपत्रविहिनबाट आइसले जरिवाना अशुल गर्नसक्ने नीति विद्यमान रहेपनि यो नीति सन् २०१८ भन्दा अगाडि भने कार्यान्वयनमा ल्याइएको थिएन । त्यसपछि जरिवाना कार्यान्वयनमा ल्याउन खोजिएपनि आइस सफल हुन सकेको थिएन । आइसले जारी गरेको जरिवानामध्ये १ प्रतिशतमात्र संकलन गर्न सफल भएको थियो ।
त्यस्तै अध्यागमन न्यायाधिसको देशनिकालाको आदेशको पालना नगर्ने कागजपत्रविहिनलाई प्रतिदिन ७ सय ९९ डलरसम्म जरिवाना गर्ने व्यवस्था रहेको थियो । त्यस्तै देशनिकालाको आदेश पाइसकेपछि आफै अमेरिका छाड्नुपर्नेहरुले नछाडेको खण्डमा ३ हजार डलर जरिवानाको व्यवस्था रहेको थियो ।
ओहायाको कोलम्बसमा एउटा चर्चमा शरण लिएर बसेकी एकजना कागजपत्रविहिनलाई आइसले ४ लाख ९७ हजार ७ सय ७७ डलर जरिवानासहितको पत्र पठाएको थियो । मेक्सिकोबाट १६ बर्षको उमेरमा आफ्ना पितासँग अमेरिका आएकी ४२ बर्षीया एडिथ स्पीनल मोरेनोलाई आइसले देशनिकालाको आदेश नमानेको भन्दै जरिवाना तोकेको थियो ।
सन् २०१६ को अक्टोबर २८ मा उनलाई अमेरिकी अध्यामगन अदालतले देशनिकालाको आदेश दिएको थियो । सन् २०१७ को सेप्टेम्बर २५ मा उनले आइससमक्ष आफ्नो फर्कने टिकट पेश गर्नुपर्ने र अक्टोबर १० मा अमेरिका छाड्नुपर्ने सहमति भएको थियो ।
तर उनी आइसले तोकेको समयमा अमेरिका नछाडी ओहायोमा रहेको एउटा चर्चमा शरण लिन पुगिन् । सन् २०१८ को फरबरी २३ मा उनले आइसले लगाइदिएको जीपीएस तोडेर फ्याकेकी थिइन् । त्यसपछि मार्च २० मा आइसले उनलाई यसबारे रिपोर्ट गर्न निर्देशन दिएपनि उक्त निर्देशन पालना गरेकी थिइनन् ।
देशनिकालाको आदेशपछि पनि जानाजान अमेरिका नछाडेको भन्दै उनलाई त्यती ठूलो रकम जरिवाना तोकिएको थियो । उनका तीनजना छोराछोरीहरु रहेका छन्, जसमध्ये दुईजना अमेरिकाका नागरिक हुन् । उनले आफ्नो पूरै जीवन अमेरिकामा बिताएको र मेक्सिको फिर्ता जान नसक्ने बताएकी थिइन् ।
पछि आइसले उनीसहित अमेरिकाका विभिन्न स्थानमा चर्चमा शरण लिएका अरु ६ जना कागजपत्रविहिन महिलाहरुलाई तोकिएको जरिवाना खारेज गरिदिएको थियो ।