अमेरिकाबाट नेपालमा भ्याक्सिन सहयोगका लागि राज्य सांसद भण्डारीको हस्ताक्षर अभियान
प्रकाशित मिति : बैशाख २४, २०७८ शुक्रबार
नेपालमा भ्याक्सिन सहयोगका लागि अमेरिकी संसदलाई आव्हान गर्दै मेरिल्याण्डका राज्य सांसद ह्यारी भण्डारीले हस्ताक्षर अभियान सुरु गरेका छन् । नेपाललाई भ्याक्सिन, भेन्टिलेटर र अन्य स्वास्थ्य सामाग्री सहयोगका लागि आव्हान गर्दै यो अभियान सुरु गरिएको हो ।
चेन्ज डट ओर्गमा सुरु गरिएको हस्ताक्षर अभियानमा भनिएको छ हामी हाम्रा संघीय साझेदारहरुलाई राष्ट्रिय स्वास्थ्य संकट न्यूनीकरण गर्न खोप, भेन्टिलेटर र अन्य स्वास्थ्य सामाग्रीहरु तुरुन्त नेपाल पठाउन आग्रह गर्दछौं ।
नेपालमा कोरोना महामारी एकदमै छिटो बढिरहेको र भ्याक्सिन वितरण कार्य रोकिएको अवस्थामा अमेरिका समक्ष भ्याक्सिनको आग्रह गर्दै यो अभियान सुरु गरिएको हो ।
तपाई पनि हस्ताक्षर गर्नका लागि यहाँ क्लीक गर्नुहोला ।
एकमहिना अगाडि नेपालको संक्रमणदर दैनिक झण्डै एकसयमात्र रहेकोमा बिहिबार सार्वजनिक रिपोर्टमा एकदिनमा ९ हजार ७० जनामा कोरोना भाइरस संक्रमण पुष्टि भएको छ। जुन अहिलेसम्मकै धेरै हो। स्वास्थ्य तथा जनसंख्या मन्त्रालयका अनुसार २० हजार ३६७ पीसीआर परीक्षणमा ८९७० र ७७५ एन्टिजेन परीक्षणमा १०० जना गरी ९ हजार ७० जनामा संक्रमण पुष्टि भएको हो ।
बिहिबारमात्र सीएनएनले कोरोना महामारीका कारण नेपालको संकट भारतको भन्दा खराब हुनसक्ने विशेष कभर स्टोरी प्रकाशित गरेको थियो । गत सप्ताहन्तमामात्र नेपालमा कुल परीक्षण गरिएकाहरुमध्ये ४४ प्रतिशतमा कोरोना संक्रमण पुष्टी भएको थियो ।
नेपालमा दैनिक संक्रमणदर भारतमा कोरोनाको दोश्रो लहर फैलिएको केहीसाता लगत्तै अप्रिलको मध्यबाट बढ्न थालेको हो । नेपालमा हरेक एकलाखमा कोरोना संक्रमणदर दुईसाताको अवधिमामात्र ७ गुणाभन्दा बढी बढेको छ ।
अप्रिलमा विश्वको ठूलोमध्येको धार्मिक जमघट भारतको कुम्भमेलामा नेपालीहरुले पनि सहभागिता जनाएका थिए । साथै घरघरमा र भारतीय सिमा क्षेत्रमा धार्मिक जमघटहरुमा पनि नेपालीहरु भेला भएका थिए । जसमा सहभागी नेपालका पूर्वराजा रानीहरु कोरोना संक्रमणका कारण अस्पतालमा उपचाररत रहेका छन् । त्यही समयमा उपत्यकामा पनि ठूला ठूला धार्मिक जमघटयुक्त उत्सवहरु भएका थिए । सहभागीहरुले बोकेका प्लेकार्डमा ज्यानभन्दा पनि चालपर्वहरु प्रिय भएको उल्लेख थियो ।
अप्रिल २४ मा कोरोना संक्रमण दर दैनिक २४ सय भन्दा धेरै पुग्दा समाचारहरु प्रधानमन्त्री ओलीले सन् २०१५ को महाभूकम्पबाट भत्किएको धरहराको उद्घाटन गरेको समाचारमा केन्द्रीत रहेका थिए । त्यसको पाँचदिनपछि कोरोना संक्रमणदर दोब्बर बढेर ४८ सय पुगेको थियो । अर्कोदिनदेखि सरकारले उपत्यकाब्यापी लकडाउन लागु गरेको थियो । लगत्तै अप्रिल ३० मा जारी सरकारी वक्तब्यमा महामारी थामिनसक्नुभएको उल्लेख थियो ।
नेपालमा महामारीको सुरुताका झण्डै ३ करोड जनताका लागि १५९५ आईसियु बेड र ४८० मात्र भेन्टिलेटर रहेका थिए । विश्व बैंकको तथ्यांक अनुार हरेक एकलाख जनसंख्याको लागि शुन्य दशमलव ७ प्रतिशत चिकित्सकमात्र रहेका छन् । भारतमा हरेक एकलाख जनसंख्याका लागि शुन्य दशमलव ९ प्रतिशत चिकित्सक छन् ।
शनिबारसम्म ७७ वटा जिल्लामध्ये २२ जिल्लाका अस्पतालहरुमा बिरामी राख्नका लागि बेडको अभाव भएको छ । भारतमा कोरोना महामारी निदर्यी बनिरहँदा नेपाल सरकारले पछिल्लो चरणमा केही कदमहरु चालेको छ । गतसाता विदेशबाट २० हजार अक्सिजन सिलिण्डरहरु अर्डर गरिएको थियो भने मंगलबारबाट नेपाली सेनाले भारतसँगको सिमाक्षेत्रमा स्वास्थ्य सुविधाहरुमा बृद्धि गरेको छ । सुदुरपश्चीममा २ हजार बेडहरुसहित २ सय बेडको आइसोलेसन केन्द्र थपिदैछ । तर त्यहाँ अक्सिजनको अभाव भएको जनाइएको छ ।
नेपालमा भारतको तुलनामा संक्रमणदर झण्डै दोब्बर रहेको छ भने ठूलो संख्यामा कोरोना संक्रमणका केसहरु रेकर्डमा छैनन् । सुरुका दिनमा परीक्षण कमजोर भएपनि पछि हरेकदिन २० हजारसम्मको परीक्षण प्रकृयामा लैजानसकिने क्षमता बृद्धि गरिएको थियो । सुरुका दिनमा परीक्षणका लागि स्वाबहरु हङकङ पठाइएको थियो ।
अर्कातर्फ नेपालमा भ्याक्सिन वितरण दर अत्यन्तै कम रहेको छ । कुल जनसंख्याको ७ दशमलव २ प्रतिशतलेमात्र कम्तीमा एकडोज भ्याक्सिन प्राप्त गरेका छन् । जुन भारतको भन्दा कम हो । भारतमा कुल जनसंख्याको १० प्रतिशतले कम्तीमा एकडोज भ्याक्सिन लगाएका छन् ।
झण्डै १६ लाखले भ्याक्सिनको दोश्रो डोजको प्रतिक्षा गरिरहेका छन् तर भ्याक्सिन स्टकमा छैन ।