लकडाउनमा पनि अमेरिकी दूतावास काठमाडौंबाट भिजिटर भिसा नविकरण, एकमहिनामा ५०९ जनालाई
प्रकाशित मिति : जेष्ठ ८, २०७८ शनिबार
अप्रिल २९ देखि अमेरिकी दूतावास काठमाडौंले भिसा अप्वाइन्टहरु रद्द गरेपनि भिजिटर भिसा नविकरणको काम भने जारी नै राखेको जनाएको छ । अन्य गैरआप्रवासी भिसा जारी गर्न रोकेको बेलामा समेत विना अन्तरवार्ता भिजिटर भिसाको नविकरण जारी राखेको अमेरिकी दूतावास काठमाडौंले अप्रिलमा मात्र ५०९ जनाको को भिजिटर भिसा नविकरण गरेको छ ।
अधिकांश भिजिटर भिसा नविकरण भएपनि आपतकालिन अवस्थामा अमेरिका भ्रमण गर्नुपर्ने अवस्था भएकाहरुका लागि नयाँ भिसा पनि जारी गरिएको जनाइएको छ ।
अमेरिकी विदेशमन्त्रालय ब्यूरो अफ कन्सुलर अफेयर्सबाट जारी तथ्यांक अनुशार यो संख्या मार्चको तुलनामा केही कम भएपनि महामारीपछिका महिनाहरुका तुलनामा भने उल्लेख्य नै हो । मार्चमा भने अमेरिकी दूतावास काठमाडौंले ७६० जनाको भिजिटर भिसा नविकरण गरेको थियो । जुन महामारी सुरु भएयताकै सबैभन्दा धेरै रहेको थियो ।
मे महिनामा नेपालमा महामारी चर्को बनेपछि पनि भिजिटर भिसा नविकरणको काम जारी राखेको दूतावासले जनाएको छ । तर विगतको तुलनामा भने भिसा प्रकृयामा लैजान लामो समय लाग्नसक्ने दूतावासको भनाई छ । यद्यपी मार्चमा कतिजनाको भिसा नविकरण भयो भन्ने तथ्यांक भने जुन महिनामा सार्वजनिक हुनेछ ।
अप्रिलमा अमेरिकी दूतावास काठमाडौंले विभिन्न १४ श्रेणीमा गैर आप्रवासी भिसाहरु जारी गरेको छ । जसमा भिजिटर भिसा पछि सबैभन्दा धेरै विद्यार्थी र उनीहरुका डिपेण्डेण्ट ३४ जनालाई भिसा जारी गरिएको छ । अप्रिलमा १५ जनालाई कामदारभिसा एचवानबी र १७ जना कामदार भिसा वाहकका डिपेण्डेण्टहरुलाई भिसा प्रदान गरिएको छ ।
अमेरिकी सरकारले विना अन्तरवार्ता भिसा नविकरणका सन्दर्भमा यसअगाडि नै सुविधा थप गरेको थियो । भिसा सकिएको ४८ महिना ननाघेका व्यक्तिले सोही श्रेणीको गैर आप्रवासी नयाँ भिसा विना अन्तरवार्ता पनि प्राप्त गर्न सक्ने प्रावधान छ ।
यो सुविधा सन् २०२१ को डिसेम्बर ३१ सम्मका लागि थप गरिएको हो । यो सुविधा अन्तरगत विगतमा अमेरिकाको गैरआप्रवासी भिसा भएका र भिसा सकिएको ४८ महिना ननाघेकाहरुले दूतावासमा अन्तरवार्ता नै दिन नगई ड्रपबक्स सुविधाबाट नयाँ भिसा प्राप्त गर्नेछन् ।
विना अन्तरवार्ता भिसा नविकरण गर्न चाहनेहरुलाई नजिकको दूतावास वा कन्सुलेटको वेवसाइटमा हेर्न सुझाव दिइएको छ । भिजिटर लगायतका गैरआप्रवासी भिसाका सन्दर्भमामात्र यो नियम लागु हुने तर आप्रवासी भिसाका सन्दर्भमा यो नियम लागु नहुने जनाइएको छ । भिसा अन्तरवार्ता दिनुपर्ने वा नपर्ने कुराको निर्धारण सम्बन्धित दूतावास वा कन्सुलेटले गर्नेछन् ।
अमेरिकाको भिजिटर भिसा समाप्त भएको ४ बर्ष पूरा भएको छैन भने तपाईले त्यो भिसा दूतावासमा विना अन्तरवार्ता नै रिन्यु गर्न सक्नुहुनेछ । तर त्यसका लागि तपाईले मापदण्डहरु पूरा गर्नुपर्छ ।
तपाईको भिजिटर भिसा भिसा रिन्यु गर्नका लागि तपाईले सन् २००८ को जनवरी १ वा त्यसपछि पूरानो भिसाका लागि अन्तरवार्ता दिएको हुनुपर्छ । तपाईको पहिलेको भिसा मल्टिपल इन्ट्री सहितको हुनुपर्छ ।
पहिले जारी भएको भिसा पूरा अवधि अर्थात ५ बर्षका लागि नै जारी भएको हुनुपर्छ । भिजिटर भिसाका लागि हालेको आवेदन अस्वीकृत भएको हुनुहुँदैन भने पूरानो भिसा हराएको, चोरी भएको वा खारेज गरिएको हुनुहुँदैन ।
त्यस्तै जन्ममिति, नाम, राष्ट्रियता जन्मस्थान लगायतका विवरणहरु परिवर्तन भएको हुनुहुँदैन । अमेरिका भ्रमणका क्रममा अमेरिकी कानुनको पालना गरेको हुनुपर्छ भने भिसा सकिएको ४ बर्ष नाघेको हुनुहुँदैन ।
यदि यी मापदण्डहरु पूरा भएको खण्डमा तपाईले विना अन्तरवार्ता नै भिसा नविकरण गराउन सक्नुहुनेछ । त्यसका लागि तपाईले डीएस १६० नामको फर्म भने भर्नुपर्छ ।
त्यसपछि भिसा शुल्क तिरेर तपाईले अप्वाइन्टमेन्ट लिने पेजबाट आवश्यक कागजातको सुची सहितको पत्र प्राप्त गर्नुहुनेछ । त्यो पत्रको दुईकपी प्रिन्ट गरेर तपाईले एककपी पत्र, तपाईको पासपोर्ट, डीएस १६० कन्फर्मेशन पेज, विगतको भिसा, एक तस्विर, सर्पोर्टिंग कागजात दूतावाससमक्ष बुझाउनुपर्छ ।
त्यसपछि तपाईले केहीदिनमा नविकरण गरिएको भिसा पाउनसक्नुहुनेछ ।