प्रस्तावित नयाँ ग्रिनकार्ड आवेदनबाट २ प्रश्न हटाउने तयारीमा बाइडेन प्रशासन
प्रकाशित मिति : जेष्ठ १४, २०७८ शुक्रबार
बाइडेन प्रशासनले अमेरिकामा ग्रिनकार्ड आवेदन आई ४८५ को आगामी परिवर्तनमा विगतमा ट्रम्प प्रशासनबाट तय केही प्रश्नहरु हटाउने तयारी गरिरहेको जनाइएको छ । प्रस्तावित आवेदनमा उल्लेखित गिरोह सम्बन्धित प्रश्नहरु हटाउनेबारे विचार भइरहेको युएससीआईएसका पूर्व रणनीति तथा नीति प्रमुख रोब लले बताएका छन् ।
खासगरी गिरोह सम्बन्धि प्रश्नहरु हटाउने तयारीमा डिपार्टमेन्ट अफ होमल्याण्ड सेक्युरिटी रहेको छ । ती प्रश्नहरु प्रस्तावित आवेदनको १७ र १८ नम्बरमा रहेका छन् ।
अमेरिका वा अन्यत्र अपराध गर्ने उद्देश्यले तीनजना यो त्योभन्दा बढीको समुहमा तपाईको विगतमा वा अहिले सदस्यता वा आवद्धता रहेको छ ? भन्ने एउटा प्रस्तावित प्रश्न रहेको छ । त्यस्तै एउटाभन्दा बढी देशमा अपराध गर्न वा अपराधको प्रयास गर्न तीनजना यो त्योभन्दा बढीको समुहमा तपाईको विगतमा वा अहिले सदस्यता वा आवद्धता रहेको छ ? भन्ने अर्को प्रस्तावित प्रश्न रहेको छ ।
अमेरिकामा स्टाटस एड्जस्ट गरेर ग्रिनकार्डका लागि आई ४८५ आवेदन दिने गरिन्छ । यो आवेदनमा सोधिएका कैयन प्रश्नहरुको स्वघोषित जवाफ दिन आवश्यक हुन्छ । प्रश्नहरु हटाउने सन्दर्भमा कुनै अन्तिम निर्णय भने नभइसकेको युएससीआईएसले जनाएको छ ।
प्रस्तावित नयाँ आवेदन फारम यहाँ हेर्नुहोला ।
फर्म आई ४८५ को आवेदन पुनरावलोकनबारेको प्रस्तावले गतबर्ष ट्रम्प कार्यकालमा नै ६० दिनको कमेन्ट अवधि पूरा गरेको थियो । साथै ३० दिन कमेन्टका लागि अवधि थपिएको थियो । तर अफिस अफ म्यानेजमेन्ट एण्ड बजेट अन्तरगतको सुचना तथा नियामक मामला कार्यालयले बाइडेनको कार्यकाल सुरु हुनु अगाडि नै ग्रिनकार्ड आवेदनको नयाँ भर्सन पारित गर्न सकेको थिएन ।
अब ग्रिनकार्ड आवेदन आई ४८५ को नयाँ भर्सन गिरोह सम्बन्धि प्रश्नहरु हटाएर पारित गर्नका लागि सुचना तथा नियामक मामला कार्यालयमा पेश गर्न लागिएको जनाइएको छ । युएससीआईएसले नयाँ फर्मका लागि आगामी अक्टोबर ४ मा ६० दिने कमेन्ट अवधि सहितको सुचना, सन् २०२२ को जनवरी १० मा ३० दिने कमेन्ट अवधि सहितको सुचना र सन् २०२२ को फेबु्रअरी १५ मा अन्तिम स्वीकृतिका लागि सुचना तथा नियामक मामला कार्यालयमा पेश गर्ने टाइमलाइन बनाएको जनाइएको छ ।
