न्युयोर्क र आसपासका राज्यमा बर्षाका कारण मृत्यु हुनेको संख्या ४७, तीनजना नेपाली समेत
प्रकाशित मिति : भाद्र १८, २०७८ शुक्रबार
अमेरिकाको न्युयोर्क लगायत आसपासका राज्यमा भारी बर्षा, बाढी र आँधीबेहरीका कारण मृत्यु हुनेको संख्या ४७ पुगेको छ । जसमा न्युयोर्कमा मृत्यु हुने एकपरिवारका तीनजना नेपालीहरु समेत रहेका छन् । कैयनको बाढीका कारण गाडीभित्र फसेर र बेसमेन्टमा फसेर मृत्यु भएको हो ।
न्युजर्सी र न्युयोर्कमा मात्र ३९ जनाको मृत्यु भएको छ भने पेन्सिलभेनियामा ५ जनाको मृत्यु भएको छ । मेरिल्याण्ड, कनेक्टिकट र भर्जिनियामा एकएकजनाको मृत्यु भएको छ । न्यूजर्सीका गभर्नर फिल मर्फीले आफ्नो राज्यमा कम्तीमा २३ जनाको निधन भएको बताएका छन्।
न्यूयोर्क सहरमा कम्तीमा १६ जनाको मृत्यु भएको छ जसमा १९ महिनाका नेपाली मुलका बालक पनि छन्। ११ जनाले बेसमेन्टमा बाढी पसेका कारण ज्यान गुमाएका थिए । न्युजर्सीमा कम्तीमा २५ वटा घरहरु क्षतिग्रस्त भएका छन् ।
न्युयोर्क सिटीमा मात्र प्रहरीले ६९ वटा पानी सम्बन्धित उद्दार र १६६ वटा अन्य उद्दारहरु गरेको थियो । ट्रेनमा सवार ८ सयभन्दा धेरैलाई खाली गराइएको थियो भने ५ सय भन्दा बढी न्युयोर्कबासीलाई बाढीग्रस्त सडक, भवन र ट्रेन स्टेशनबाट उद्दार गरिएको थियो ।
न्युयोर्कमा एकजना महिला चालक रोजा अमोन्तेले तीनदेखि ४ फिटसम्म पानीले बस डूब्दापनि यात्रुहरुलाई सकुशल गन्तव्यमा लगेकी थिइन् । रातभर उनले गरेको कार्यको प्रशंसा गरिएको छ । यात्रुहरु बसभित्रै डुब्ने डलरले सिटमा उभिएका थिए ।
एकै परिवारका तीन नेपालीको मृत्यु
न्युयोर्कमा भएको बर्षा र बाढीका कारण मृत्यु हुने १९ महिनाका बालकसहित तीनजना नेपालीहरु रहेको पुष्टी भएको छ । न्युयोर्कको क्वीन्स उडसाइड ६४ स्ट्रीटमा रहेको घरमा उनीहरु मृत अवस्थामा फेला परेका थिए ।
उनीहरु २० बर्षकी बर्षकी मिङमा शेर्पा, ४९ बर्षका आङ गेलु लामा र १९ महिनाका बालक लोप्साङ लामा रहेको जनाइएको छ ।
बेसमेन्टमा बस्दै आएका उनीहरुको बेसमेन्ट अपार्टमेन्टमा बाढी पसेको थियो । उनीहरुले तेश्रो तल्लामा बस्ने एकजना महिलालाई बेलुका साढे ९ बजेतिर आत्तिएर फोन गरेका थिए । मिङमाले आत्तिएर पानी पसिरहेको बताउँदा तेश्रो तल्लामा बस्ने महिलाले आफू बसेको तेश्रो तल्लामा आउन भनेकी थिइन् ।
उनीहरुले झ्यालबाट पानी पसेको बताएका थिए । पछि प्रहरी घटनास्थलमा पुग्दा उनीहरु मृत अवस्थामा भेटिएका थिए ।
उनीहरु सोलुखुम्बु जुनबेसीका रहेको र झण्डै डेढ दशकदेखि अमेरिकामा बस्दै आएको जनाइएको छ ।