समलिंगी पुरुषलाई झुक्याएर भेटेर तालिबान लडाकुबाट बलात्कार र कुटपिट
प्रकाशित मिति : भाद्र १९, २०७८ शनिबार
तालिवान लडाकुहरुले एकजना समलिंगी पुरुषलाई काबुलमा बलात्कार र कुटपिट गरेको खुलासा भएको छ । अफगानिस्तानबाट सुरक्षित तरिकाले बाहिर पठाउने प्रतिज्ञा गरेर सामाजिक सञ्जालबाट तालिवान सेनाहरुले ती समलिंगी पुरुषलाई भेटेको जनाइएको छ ।
तालिवानले अफगानिस्तानमा नियन्त्रण कायम गरेपछि धेरै सिमान्तकृत यौन अभिमुखिकरण, लैंगिक पहिचान र यौन विशेषताका व्यक्तिहरु आफगानिस्तान छाड्न प्रयास गरिरहेको अवस्थामा तालिवानको यस्तो दुब्र्यबहार सार्वजनिक भएको हो । सामाजिक सञ्जालमा आफ्नो पहिचान लुकाएर तालिवानहरुले उद्दार गर्ने प्रतिज्ञा गर्दै तीनसातासम्म कुरा गरेपछि ती समलिंगी पुरुष भेट्न राजी भएका थिए ।
जब ती समलिंगी पुरुष भेटघाटका लागि आए, त्यसपछिमात्र भेट्न बोलाउनेहरु तालिवान रहेको थाहा भएको थियो । भेट्न आएपछि तालिवानहरुले उनलाई बलात्कार र कुटपिट गरेको यौनिक अल्पसंख्यकको अधिकारका लागि कृयाशिल आर्टेमिस अकबेरीले आईटीभीलाई बताएका छन् ।
तालिवान लडाकुहरुले फेरीपनि यस्तो गर्नसक्ने भन्दै अधिकारकर्मीहरुले यौनिक अल्पसंख्यक समुदायका व्यक्तिलाई सचेत गराएका छन् । तालिवानहरुले नक्कली प्रोफाइल बनाएर आफूहरु पनि यौनिक अल्पसंख्यक समुदायको व्यक्ति भएको भन्दै कुराकानी गरेर धोका दिनसक्ने भन्दै सचेत गराइएको हो ।
तालिवानको शाषनमा अफगानिस्तानमा यौनिक अल्पसंख्यक समुदायका व्यक्तिहरु दैनिक त्रास र भविश्यको चिन्तामा रहेको जनाइएको छ । विगतमा तालिवानको शाषनकालमा समलिंगी पुरुषलाई मृत्युदण्ड दिइएको थियो । तालिवानका न्यायाधिसले समलिंगी पुरुषलाई ढुंगाले हानेर मृत्युदण्ढ दिने वा ९ फुटको पर्खालले किचेर मार्ने चेतावनी दिएका छन् ।
अफगानिस्तानमा विगतका सरकारका पालामा पनि सरकारी स्तरबाट सामाजिक सञ्जालको प्रयोग गरेर समलिंगीहरुलाई फन्दामा पारेर ज्यान लिने घटनाहरु भएका छन् । समलिंगी र दुईलिंगी पुरुषहरुलाई फसाउनका लागि सरकारले सामाजिक सञ्जाललाई हनी ट्रयापका रुपमा प्रयोग गर्दै आएको छ ।
राष्ट्रिय सुरक्षा अधिकारीहरुले नै फेसबुक र ग्राइन्डरहरुमा नक्कली प्रोफाइल बनाएर भेट्न चाहेको बताउने गरेको तथा भेट्न आएपछि उनीहरुलाई अन्यन्त्र लगेर हत्या गर्ने र शव मिल्काउने गरेका घटनाहरु अफगानिस्तानमा भएका थिए । तालिवानकालमा नभई त्यस्ता घटनाहरु असरफ घानी र हमिद कारजाईको शाषनकालमा भएका थिए ।
अफगानी लेखक तथा समलिंगीहरुको अधिकारका लागि कृयाशिल हमिद जाहेरले तालिवानको शाषनकालमा पनि यस्तै प्रकारका घटना हुनसक्ने चेतावनी दिएका छन् । यदि तालिवानहरुले फेसबुक र ग्राइण्डरमा प्रतिबन्ध नलगाएको खण्डमा उनीहरुले ती एप्लीकेशनलाई समलिंगीहरु प्क्राउ गर्न प्रयोग गर्नसक्ने सम्भावना रहेको जाहेरको भनाई छ ।
