हैटीमा अपहरित १७ अमेरिकन र क्यानेडियन धर्मप्रचारकको रिहाईका लागि १७ मिलियन डलर फिरौती माग
प्रकाशित मिति : कार्तिक २, २०७८ मंगलबार
हैटीमा १७ जना अमेरिकन र क्यानेडियन धर्मप्रचारकहरुको अपहरण गरेको गिरोहले १७ मिलियन डलर फिरौती रकम मागेको छ । अपहरण गरिएका हरेकका लागि १ मिलियन डलरका दरले १७ मिलियन डलर फिरौती मागिएको हैटीका अधिकारीहरुले जनाएका छन् ।
शनिबार हैटीमा १६ जना अमेरिकन र एकजना क्यानेडियन धर्म प्रचारक कुख्यात गिरोहको अपहरणमा परेका थिए । यसैबर्षको सुरुतिर कैयन रोमन क्याथोलिक पादरीहरुको अपहरणमा संलग्न कुख्यात गिरोहले नै एउटा अनाथालयबाट फर्कदै गरेका धर्मप्रचारकहरुलाई अपहरण गरेको हो ।
अपहरणमा पर्नेहरु ओहायोमा रहेको क्रिश्चियन सहायता संस्था सम्बन्धित रहेका छन् । अपहरित हुनेहरुमा ५ जना पुरुष, ५ जना बालबालिकाहरु र ७ जना महिलाहरु रहेका छन् । अपहरित हुनेमा ८ महिनाको बच्चा समेत रहेका छन् । अन्य बालबालिकाहरु ३, ६, १४ र १५ बर्षका रहेका छन् । उनीहरुलाई बसबाट बाहिर निकालेर अपहरण गरिएको थियो ।
अपहरणमा संलग्न गिरोहको नाम ४०० माओजो रहेको छ । यो गिरोह गाडीहरुमाथि आक्रमण र कार तथा बसबाट मानिसहरुको अपहरणका लागि पनि कुख्यात रहेको छ । सिंगै बस र कार अपहरण गर्ने यस्तोखालको अपहरण सामुहिक अपरण रहेको जनाइएको छ ।
हैटीमा क्रिश्चियन धर्म प्रचारकहरुको श्रृंखलावद्ध अपहरण हुदै आएको छ । अमेरिकी अधिकारीहरुले मुलुकको सुरक्षा चुनौतिको मूल्यांकन गर्न हैटीको भ्रमण गरेको केही दिन लगत्तै यो घटना भएको हो । त्यस्तै हैटीमा रहेको राजनीतिक कार्यालयको म्यान्डेड राष्ट्रसंघको सुरक्षा परिषद्ले एकमतले ९ महिना बढाएको भोलिपल्ट यो घटना भएको हो ।