सिमाक्षेत्रमा बिछोडिएका परिवारलाई साढे ४ लाख डलरका दरले दिनेबारे विचार गर्दै बाइडेन प्रशासन
प्रकाशित मिति : कार्तिक १२, २०७८ शुक्रबार
सिमाक्षेत्रमा बिछोडिएका परिवारलाई साढे ४ लाख डलरका दरले रकम दिनेबारे बाइडेन प्रशासनले विचार गरिरहेको जनाइएको छ । ट्रम्प प्रशासनको पालामा अमेरिका र मेक्सिकोको सिमाक्षेत्रमा अलगथलग पारिएका परिवारलाई उक्त रकम दिनेबारे बाइडेन प्रशासनले आन्तरिक तयारी गरिरहेको छ ।
हरेक परिवारलाई साढे ४ लाख डलरका दरले रकम प्रदान गर्दा १ बिलियन डलर खर्च हुने जनाइएको छ । अमेरिकाको डिपार्टमेन्ट अफ जस्टिस, होमल्याण्ड सेक्युरिटी र हेल्थ एण्ड ह्युमन सर्भिसले उक्त रकम प्रदान गर्नेबारे तयारी गरिरहेका छन् । उनीहरुले ट्रम्प प्रशासनका पालामा बुबाआमा र बालबालिकाहरु अलगथलग पार्दा मानसिक चोट परेकोबारे मुद्दा समाधानको प्रयास गरिरहेका छन् ।
अधिकांश परिवारमा बुबाआमामध्ये एकजना र एकजना बच्चाहरु गैरकानूनी रुपमा सिमा पार गरेका र विछोडिएकाहरु रहेका छन् । उनीहरुले सानो रकम पाउनसक्ने जनाइएको छ । ट्रम्प प्रशासनका पालामा झण्डै ५५ सय बालबालिकाहरु अलगथलग भएको रिपोर्ट भएतापनि क्षतिपूर्ति पाउने परिवारहरु भने त्यो भन्दा कम हुने जनाइएको छ ।
ट्रम्पको शुन्य सहनशीलता नीति अन्तरगत सन् २०१८ को अप्रिलबाट सिमाक्षेत्रमा परिवारहरु अलग अलग भएका थिए । ट्रम्पकालिन नीतिले बालबालिकासहित सिमाक्षेत्रबाट गैरकानूनी रुपमा प्रवेश गर्ने लगायत सबै बयस्कहरुलाई कारवाहीको दायरमा ल्याएको थियो । सोही क्रममा परिवारहरु अलग अलग बनाइएको थियो ।
बयस्कहरुसँग प्रवेश गरेका बालबालिकाहरुलाई बुबाआमा वा अभिभावकबाट अलग बनाएर हेल्थ एण्ड ह्युमन सर्भिसको छुट्टै हिराशतमा राखिएको थियो । कतिपय परिवारहरु पुनर्मिलनविना नै देशनिकालामा परेका थिए । ट्रम्पले यो नीति सन् २०१८ को जुन २० मा कार्यकारी आदेश मार्फत समाप्त गरेका थिए ।
यो नीतिबिरुद्धको मुद्दामा यसरी परिवारहरु अलग गराइदा मानसिक चोट परेको दावी गरिएको छ । मुद्दामा बुबाआमाबाट लामो समय अलग बनाएर हिराशतमा राखिदा बालबालिकाहरुलाई दीर्घकालिन रुपमा चोट परेको भन्दै हरेक परिवारका लागि ३४ लाख डलरका दरले क्षतिपूर्ति मागिएको छ । वकिल र परिवारहरु नोभेम्बरको अन्तिमसम्ममा रकमबारे एउटा सहमतिमा पुग्ने अपेक्षा गरिएको छ ।
