ट्रम्पका राजनीतिक सहयोगी ब्याननबाट एफबीआईसमक्ष आत्मसपर्मण, राखियो हिराशतमा
प्रकाशित मिति : कार्तिक २९, २०७८ सोमबार
पूर्व राष्ट्रपति डोनाल्ड ट्रम्पका राजनीतिक सहयोगी स्टिभ ब्याननले एफबीआई समक्ष आत्मसमर्पण गरेका छन् । जनवरी ६ मा क्यापिटल हिल आक्रमणको छानबिन गर्ने हाउस चयन समितिलाई सहयोग गर्न अस्वीकार गरेपछि उनीबिरुद्ध संसदको आपराधिक अवहेलनाको अभियोग लगाइएको थियो ।
आत्मसपर्मणपछि ब्याननलाई हिराशतमा लिइएको छ । विगतमा पनि संसदको अवहेलनाको आरोप डेमोक्रेटिक र रिपब्लिकन प्रशासनका अधिकारीहरूले सामना गरेका छन् तर अवहेलनाको लागि आपराधिक अभियोगहरू नै लगाइनु भने अत्यन्तै दुर्लभ हो ।
आक्रमणको बारेमा आफूलाई थाहा भएको विषयमा गवाही दिन असफल भएकोमा दुईवटा अवहेलनाको आरोप लगाइएको थियो। सोमबार एफबीआईको वासिंटन फिल्ड अफिसमा आत्मसमर्पणका लागि जाने क्रममा उनले आफ्नो एउटा रेडियो कार्यक्रमको क्लीप सामाजिक सञ्जालमा राख्दै समर्थकहरुलाई आँखा टिकाइराख्न सल्लाह दिएका छन् ।
आफूहरुले बाइडेन शासन हटाउन लागेको उनले बताएका छन् । तर उनले आफूमाथि लागेको संसदको अवहेलनाको अभियोगको बारेमा भने केही बताएका छैनन् । उनले आफ्ना समर्थकहरुलाई ध्यान केन्द्रीत गरिरहन आग्रह गरेका छन् । आत्मसमर्पणका लागि जाने क्रममा उनी आफ्ना वकिल डेभिड शोहेनसँग देखिएका थिए । उनलाई सोमबार लगत्तै संघीय अदालतमा अभियोग लगाउने तयारी गरिएको थियो ।
उनका वकिलले समितिलाई बारम्बार पठाएको पत्रमा ट्रम्पसँग ब्याननको सञ्चार विशेषाधिकार प्राप्त भएको दाबी गरेका छन्। डोनाल्ड ट्रम्प राष्ट्रपति भएको बखत ब्याननले उनका बरिष्ठ सल्लाहकार र ह्वाइटहाउसका मुख्य रणनीतिकारका रुपमा काम गरेका छन् ।
सन् २०२० मा ब्याननले अमेरिकाका बरिष्ठ सरुवा रोग विशेषज्ञ एन्थोनी फाउची र एफबीआईका निर्देशक क्रिस्टोफर वारेको टाउको काट्नुपर्ने भन्दै ट्वीट गरेका थिए । त्यसपछि ट्वीटरको उनको एकाउन्ट स्थायीरुपमा नै बन्द गरिदिएको थियो ।
