११,१७२ नेपाली विद्यार्थी अमेरिकामा अध्ययनरत, विश्वमा १२ औं, दक्षिण र मध्य एसियामा दोश्रो
प्रकाशित मिति : कार्तिक ३०, २०७८ मंगलबार
अमेरिकामा अध्ययन गर्ने नेपाली विद्यार्थीहरुको संख्या विश्वकै १२ औं नम्बरमा रहेको छ । ओपन डोर्स रिपोर्ट अनुशार शैक्षिक शत्र सन् २०२०/२०२१ मा अमेरिकामा ग्रयाजुएट र अण्डरग्रयाजुएट गरिरहेका नेपाली विद्यार्थीहरुको संख्या ११ हजार १ सय ७२ रहेको छ ।
सोमबार सार्वजनिक रिपोर्ट अनुशार दक्षिण र मध्य एसियाका देशहरुबाट अमेरिकामा अध्ययन गर्ने विद्यार्थीहरुमा नेपालीहरु दोश्रो नम्बरमा रहेका छन् । पहिलोमा भारतीयहरु रहेका छन् । अघिल्लो शैक्षिक शत्रको तुलनामा शैक्षिक शत्र २०२०/२०२१ मा अमेरिकामा अध्ययनरत नेपाली विद्यार्थीहरुको संख्यामा गिरावट आएको छ ।
अघिल्लो शैक्षिक शत्रमा १२ हजार ७ सय ३० नेपाली विद्यार्थीहरु अध्ययनरत रहेकोमा अहिले त्यसमा १२ दशमलव २ प्रतिशतले गिरावट आएको हो । शैक्षिक शत्र २०१८/२०१९ मा अझ धेरै अर्थात् १३ हजार २२९ नेपाली विद्यार्थीहरु अमेरिकामा अध्ययनरत रहेका थिए । शैक्षिक शत्र २०१७ /२०१८ मा १३ हजार २ सय ७० जना नेपाली विद्यार्थीहरु अमेरिकामा अध्ययनरत रहेका थिए । अमेरिकामा सबैभन्दा धेरै नेपाली विद्यार्थी रहेको शैक्षिक शत्र यही थियो ।
शैक्षिक शत्र २०२०/२०२१ मा विश्वभरबाट अमेरिकामा अध्ययन गर्ने विद्यार्थीहरुको संख्या ९ लाख १४ हजार रहेको छ । कोरोना महामारीका बाबजुत पनि अमेरिका नेपाली विद्यार्थीहरुको लोकप्रिय गन्तव्य रहदै आएको छ । महामारीका कारण शैक्षिक कार्यक्रम र भिसा प्रभावित भएपनि महामारीका बीच पनि अमेरिकामा अध्ययनका लागि जाने नेपाली विद्यार्थीहरुको संख्या उल्लेख्य रहेको छ ।
नेपाली विद्यार्थीहरु ५ हजार ३ सय २७ जना अण्डरग्रयाजुएट अध्ययनरत रहेका छन् भने ३ हजार ६ सय ५५ जना ग्रयाजुएट लेभलमा अध्ययनरत रहेका छन् । नन डिग्रीमा ८२ जना र ओपीटीमा २१०८ जना रहेका छन् ।
महामारीका कारण शैक्षिक शत्र २०२०/२०२१ मा अमेरिकामा भर्ना हुने अन्तर्राष्ट्रिय विद्यार्थीहरुको संख्या भने ७ बर्षमा नै कम बिन्दुमा पुगेको छ । अर्थात् शैक्षिक शत्र २०१४/२०१५ भन्दा पनि तल झरेको छ । विश्वमा सबैभन्दा धेरै चाइनिज विद्यार्थीहरु अमेरिकामा अध्ययनरत रहेका छन् । दोश्रोमा भारतीयहरु छन् ।
कभर तस्वीर अमेरिकी दूतावास काठमाडौंको फेसबुक पेजबाट साभार ।
