अमेरिकामा एसाइलम खोज्नेलाई अदालतमा उपस्थीत हुने सुचनाविना रिहा गर्न बन्द
प्रकाशित मिति : मंसिर २, २०७८ बिहीबार
अमेरिकामा सिमाक्षेत्रबाट गैर कानूनी रुपमा प्रवेश गरेर एसाइलम खोज्नेलाई अदालतमा उपस्थीत हुने कागजविना रिहा गर्न बन्द गरिएको डिपार्टमेन्ट अफ होमल्याण्ड सेक्युरिटीका सेक्रेटरी अलेहान्द्रो मेयरकासले बताएका छन् । ६० दिनभित्र इमिग्रेशन एण्ड कस्टम इन्फोर्समेन्ट आइसको अफिसमा उपस्थीत भएर प्रकृया सुरु गर्ने पत्रसहित रिहा गरिदै आएकोमा उक्त अभ्यास बन्द गरिएको हो ।
बाइडेन प्रशासनले अमेरिका र मेक्सिकोको सिमाक्षेत्रमा पक्राउ परेका दशौं हजार आप्रवासीहरुलाई ट्रम्पकालिन स्वास्थ्य सम्बन्धित आदेशका आधारमा देशनिकाला गरिरहेको छ । कतिपयलाई अदालतमा उपस्थीत हुने नोटिस टु अपियरका साथमा अमेरिकामा रिहा गर्ने गरिएको छ । यो कागजातमा आप्रवासीले निश्चित समय र मितिमा निश्चित अध्यागमन अदालतमा उपस्थीत हुनका लागि मार्गनिर्देश गर्छ ।
तर यो बर्षको सुरुतिर अध्यागमन हिराशतहरु भरिएपछि आप्रवासीहरुलाई छिटो हटाउनका लागि सीबीपीले नोटिस टु अपियर बिना नै रिहा गरेको थियो । उनीहरुलाई नजिकको आइस अफिसमा उपस्थीत हुनका लागि नोटिस टु रिपोर्ट दिइएको थियो । आप्रवासीहरुलाई देशनिकाला वा एसाइलमको प्रकृया अगाडि बढाउनका लागि अदालतमा उपस्थीत हुने मिति नदिइकनै रिहा गर्दा बाइडेन प्रशासनको आलोचना भएको थियो ।
जनवरी १ देखि अक्टोबर ३१ सम्म सीबीपीले ९४ हजार ५ सय ८१ जनालाई नोटिस टु रिपोर्ट दिएको र प्रकृया सुरु गर्नका लागि ६० दिनभित्र आइसको अफिसमा सम्पर्क गर्न निर्देश गरेको मेयरकासले बताएका छन् । तर अब उक्त अभ्यास सम्पूर्ण रुपमा बन्द गरिएको र अबदेखि अमेरिकामा रिहा हुने आप्रवासीहरुले अदालतमा उपस्थीत हुने पत्र प्राप्त गर्ने उनको भनाई छ ।
अमेरिकाका अध्यागमन अधिकारीहरुले ६० दिनभित्र आइसको अफिसमा उपस्थीत हुने शर्तमा रिहा गरेकाहरुलाई अदालतमा उपस्थीत हुन र आइसको थप प्रकृयाका बारेमा जानकारी दिन नोटिस टु अपियरसहितका पत्र पठाउन सुरु गरेका छन् । आइसको अफिसमा हुने अप्वाइन्टमेन्टका बेलामा आइसका अधिकारीहरुले आवेदन पुनरावलोकन गर्ने, बायोमेट्रिक लिने लगायतका काम गर्नेछन् । यसरी आउनेलाई पक्राउ नगरिने आइसले जनाएको छ ।
