क्रिसमस ट्रीबाट आगो सल्किदा पेन्सिलभेनियामा एकै परिवारका ३ को मृत्यु, २ कुकुरको पनि ज्यान गयो
प्रकाशित मिति : पुस १०, २०७८ शनिबार
अमेरिकाको पेन्सिलभेनियामा क्रिसमस ट्रीबाट सुरु भएको आगोले घर जल्दा बाबु र २ छोराको मृत्यु भएको छ । सुख्खा क्रिसमस ट्री र विद्युत शटका कारण घरमा आगो लागेको पेन्सिलभेनियाको क्वेकरटाउनले जनाएको छ । आगो क्रिसमस ट्री भएको स्थानबाट सुर भएर सिंगै घर ध्वस्त भएको छ ।
आगलागीबाट बाबु एरिक किङ र उनका २ जना एलिमेन्ट्री स्कुलमा पढ्ने छोराहरुको मृत्यु भएको हो । क्रिसमसको विहानै यस्तो दुखद खबर आउँदा आफूहरु स्तब्ध भएको क्वेकरटाउन कम्युनिटी स्कुल डिस्ट्रिक्टले जनाएको छ ।
विहान १ बजेर २२ मिनेटमा घटनास्थलमा प्रहरी र अग्नी नियन्त्रकहरु पुगेका थिए । आगलागी हुँदा घरको दोश्रो तलामा परिवारका ५ जना सदस्यहरु सुतिरहेका थिए । उद्दारकर्ताहरु घटनास्थल पुग्ने बित्तिकै घरभित्र छिरेर उद्दारको प्रयास गरेपनि आगोको ज्वालाका कारण घरभित्र छिर्न असम्भव भएको थियो ।
उद्दारकर्ताहरु पुग्दा अगाडिको ढोका र झ्याल बन्द रहेको थियो भने आगो पूरै घरमा फैलिरहेको थियो । केहीबेरपछि अग्नी नियन्त्रकहरु घरभित्र पस्दा ४१ बर्षका एरिक किङ र दुई छोराको शवमात्र भेटिएको थियो । बच्चाहरुकी आमा र घरका सबैभन्दा जेठा छोरा भने बाहिर निस्कन सफल भएका थिए । उनीहरु आगोले जलेर सामान्य घाइते भएका छन् ।
आगलागीमा घरभित्र रहेका दुईवटा कुकुरको पनि जलेर मृत्यु भएको छ । परिवारको सहयोगका लागि गोफण्डमीमा संचालिन अभियानमा झण्डै ३ लाख डलर संकलन भएको छ ।