यो बर्ष अहिलेसम्मकै धेरै झण्डै ३ लाखलाई रोजगारमा आधारित ग्रिनकार्ड दिने युएससीआईएसको लक्ष्य
प्रकाशित मिति : माघ ८, २०७८ शनिबार
यो बर्षका रोजगारमा आधारित सबै ग्रिनकार्ड प्रयोग गर्न आफूहरु प्रतिवद्ध रहेको युएससीआईएसले जनाएको छ । अमेरिकी विदेश मन्त्रालयसँगको सहकार्यमा रोजागारमा आधारित सबै ग्रिनकार्डहरु प्रयोग गर्न आफूहरु प्रतिवद्ध रहेको युएससीआईएसको भनाई छ ।
रोजगारमा आधारित आप्रवासी भिसा र ग्रिनकार्डका लागि योग्यलाई आवेदन दिन युएससीआईएसले प्रोत्साहन गरेको छ । चालु आर्थिक बर्षको ग्रिनकार्डको कोटा आगामी सेप्टेम्बरभित्र प्रयोग गरिसक्नुपर्ने प्रावधान रहेको छ । गत आर्थिक बर्षमा कोरोनाको महामारीका कारण रोजगारमा आधारित ग्रिनकार्डका सबै कोटा प्रयोग भएका थिएनन् । जसका कारण चालु आर्थिक बर्षका लागि उपलब्ध ग्रिनकार्डको कोटा अत्यन्तै उच्च रहेको छ ।
हरेक बर्ष १ लाख ४० हजार रोजगारमा आधारित ग्रिनकार्डहरु उपलब्ध हुने भएतापनि गत आर्थिक बर्षमा कोरोना महामारीका कारण पूरै संख्या प्रयोग नहुँदा यो बर्षका लागि रोजगारमा आधारित ग्रिनकार्डको कोटा २ लाख ९० हजार भन्दा धेरै रहेको छ । गत आर्थिक बर्षमा १ लाख २२ हजारभन्दा धेरै थप रोजगारमा आधारित ग्रिनकार्डहरु उपलब्ध रहेकोमा नियमित १ लाख ४० हजार जोड्दा २ लाख ६२ हजारभन्दा धेरै रोजगारमा आधारित ग्रिनकार्डहरु उपलब्ध रहेका थिए ।
In partnership with @StateDept, USCIS is committed to utilizing all available employment-based visas available this fiscal year (Oct. 2021 – Sept. 2022). If you’re eligible, we encourage you to apply. To learn more, visit: https://t.co/tpxrC1zwT9
— USCIS (@USCIS) January 21, 2022
रोजागरमा आधारित ग्रिनकार्डहरु पाँचवटा श्रेणीमा उपलब्ध हुदै आएका छन् । जसमध्ये सबैभन्दा धेरै ईबी वान, ईबी टु र ईबी थ्री श्रेणीका ग्रिनकार्डहरु प्रयोग हुँदै आएका छन् । पहिलो श्रेणी ईबी वानमा विज्ञान, कला, शिक्षा, व्यापार, वा एथलेटिक्समा असाधारण क्षमता भएका विदेशीहरू, उत्कृष्ट प्रोफेसर र शोधकर्ताहरू वा निश्चित बहुराष्ट्रिय प्रबन्धक र कार्यकारीहरू पर्छन् । यो श्रेणीमा जागिरको अफर र लेबर सर्टिफिकेशन आवश्यक नपर्ने भएकाले रोजगारदाता विना नै आफै वा वकिलको सहायतामा आवेदन दिन सकिन्छ ।
ईबी टु श्रेणीमा एड्भान्स डिग्री भएका पेशाकर्मीहरु वा सदस्य हुन् वा विशिष्ट क्षमता भएकाहरु पर्छन् । यो श्रेणीमा जागिरको अफर विना र लेबर सर्टिफिकेशन विना आवेदन दिनका लागि राष्ट्रिय रुचीका छुटका लागि आवेदन दिन सकिन्छ । त्यस्तो छुट पाउनेहरुले रोजगारदाता विना नै आफै वा वकिलको सहायतामा आवेदन दिन सकिन्छ । छुट नपाउनेहरुलाई रोजगारदाताका तर्फबाट जागिरको अफर र लेबर सर्टिफिकेशन सहित फाइल गर्नुपर्छ ।
ईबी थ्री श्रेणीमा दक्ष कामदारहरू, पेशेवरहरू, वा अन्य कामदारहरू पर्छन् । यो श्रेणीको ग्रिनकार्ड रोजगारदाताले फाइल गर्नुपर्छ भने जागिरको अफर र लेबर सर्टिफिकेशन आवश्यक पर्छ ।
