क्यानडाबाट अमेरिका आउन खोज्ने पटेल परिवारका ४ जनाको चिसोले मृत्यु, मानव तस्करको संलग्नता
प्रकाशित मिति : माघ १५, २०७८ शनिबार
क्यानाडाका अधिकारीहरूले अमेरिकी सीमानाभन्दा केही कदम नजिक एक भारतीय परिवारै मृत फेला परेको घटना मानव तस्करीसँग जोडिएको बताएका छन् । अमेरिकासँग सीमा जोडिएको क्यानाडाको मनिटोबा सहरमा चिसोका कारण ३९ वर्षीय जगदीश पटेल, ३७ वर्षीया वैशालीबेन पटेल र उनीहरूका छोराछोरी ११ वर्षीया छोरी विहांगी र तीन वर्षीय छोरा धार्मिकको मृत्यु भएको हो ।
क्यानडाका अधिकारीहरूले चार भारतीय परिवारका सदस्यहरूको मृत्यु मानव तस्करीसँग जोडिएको विश्वास गरेका छन् । क्यानडाको मनिटोबा नजिकै अत्यधिक चिसोका कारण चारैजनाको मृत्यु भएको हो । परिवार पैदलै अमेरिका जान खोजेको रात माइनस ३५ डिग्री सेल्सियस तापक्रम पुगेको थियो ।
पटेल परिवार पहिलो पटक जनवरी १२ मा क्यानाडाको टोरन्टो शहरमा विमानबाट पुगेको थियो। त्यसपछि उनीहरु पश्चिमी क्यानडाको मनिटोबामा गएका थिए । जनवरी १८ तिर सीमावर्ती शहर इमर्सनमा गएका थिए । उनीहरुको शव भोलिपल्ट राति भेटिएको थियो ।
क्यानाडा अमेरिका सीमा नजिक इमर्सनमा कुनै पनि सवारीसाधन नभेटिएपछि उनीहरुलाई कसैले कारमा लगेर त्यहाँ छाडेको जनाइएको छ । त्यसपछि उनीहरु त्हाँबाट पैदल हिँडेर अमेरिका छिर्न खोज्दा मृत्यु भएको हो ।
जनवरी १९ को साँझ अमेरिका छिर्न खोज्ने सात जना भारतीयको अर्को समूहलाई पनि सीमा क्षेत्रमा पक्राउ गरिएको थियो । पटेल परिवारको विषय सात व्यक्तिको समूहसँग सम्बन्धित भए नभएकोबारे केही बताइएको छैन । फ्लोरिडाका ४७ वर्षीय स्टिभ सान्डलाई भ्यानमा १५ जनालाई राखेर सीमा क्षेत्रतिर लैजादै गर्दा मानव तस्करीको आरोपमा पक्राउ गरिएको छ ।
यो घटना पटेल परिवारको शव भेटिएको रातको हो । शान्डको भ्यानमा दुई भारतीय यात्रुहरू पनि थिए र तिनीहरूको बुटमा खाना र पानीको क्यान थियो। पटेल परिवारको मृत्युले मनिटोबामा बस्ने भारतीय समुदाय स्तब्ध भएको छ ।
क्यानडामा अत्याधिक चिसोका बाबजुद पनि पटेल परिवार किन पैदल हिँडेर सीमा पार गर्न निस्कियो भन्नेबारे प्रश्नचिन्ह खडा भएको छ । यो परिवार ११ घण्टा हिँडेको समेत जनाइएको छ ।
अमेरिकाको दक्षिणी सिमानाबाट विना भिसा प्रवेश गर्ने घटना सामान्य मानिएपछि उत्तरीक्षेत्रबाट अमेरिका प्रवेशका घटना विरलै हुन्छन् । होमल्याण्ड सेक्युरिटी अधिकारीहरूले पटेल परिवारको मामला र मानव बेचबिखनको ठूलो अभियानको अनुसन्धान गरिरहेको बताएका छन् । यस अभियानमा स्टिभ सान्डको संलग्नता रहेको आशंका गरिएको छ ।
अदालतको कागजातका अनुसार स्टिभ सान्डलाई पक्राउ गरिएको ठाउँमा डिसेम्बर र जनवरीमा तीन अन्य मानव बेचबिखनका मुद्दाहरू पनि रिपोर्ट गरिएको थियो।