अमेरिकी अधिकारीलाई धम्कीपछि मेक्सिकोबाट अमेरिकामा एभोकाडो आयातमा रोक
प्रकाशित मिति : फाल्गुन २, २०७८ सोमबार
अमेरिकाले मेक्सिकोबाट एभोकाडो आयातमा रोक लगाएको छ । अमेरिकी अधिकारीले धम्की पाएपछि मेक्सिकोको पश्चिमी राज्य मिचोआकानबाट अमेरिकामा एभोकाडो आयात रोकिएको छ ।
मिचोआकानमा निरीक्षण कार्य गरिरहेका अमेरिकी अधिकारीको मोबाइलमा धम्कीपूर्ण फोन आएको थियो । अमेरिकी कृषि पशु र बिरुवा स्वास्थ्य निरीक्षण सेवा विभागले अर्को सुचना जारी नहुँदासम्मका लागि एभोकाडो आयातमा रोक लगाइएको जनाएको छ ।
मिचोआकान अमेरिकामा एभोकाडो निर्यात गर्न एकमात्र स्वीकृतिप्राप्त मेक्सिकोको राज्य हो। अर्थात् मिचोआकानबाट मात्र अमेरिकामा एभोकाडो आउने गर्छ । मिचिओकानमा काम गर्ने सबै कर्मचारीहरूको भौतिक सुरक्षाको ग्यारेन्टी गर्न आवश्यक उपायहरू अपनाउनेबारे अनुसन्धान भइरहेको सरकारले जनाएको छ ।
प्रोटोकलहरूको पालना गर्दै अमेरिकी स्वास्थ्य एजेन्सीका कर्मचारीहरूले पठाइने एभोकाडोहरूको निरीक्षण गर्छन् । एक पटक स्वीकृत भएपछि, एभोकाडोहरूलाई प्याकेजिङ प्रक्रियामा लगिन्छ । अनिमात्र अमेरिकामा एभोकाडो आउने गर्छ ।
विगत ६ हप्तामा मात्र मिचोआकानबाट अमेरिकामा १ लाख ३५ हजार टन एभोकाडो आइसकेको छ । यस क्षेत्रको भौगोलिक स्थितिले आपराधिक संगठनहरू र एभोकाडो जस्ता अन्य उत्पादनबाट हुने नाफाबीच युद्धको अवस्था आउने गरेको छ ।