बाइडेनबाट १३ बिलियन डलर युक्रेनलाई सहायतासहितको बृहत खर्च विधयेकमा हस्ताक्षर
प्रकाशित मिति : चैत्र १, २०७८ मंगलबार
अमेरिकी राष्ट्रपति जो बाइडेनले युक्रेनलाई १३ दशमलव ६ बिलियन डलर सहायता समेटिएको बृहत खर्च विधयेकमा मंगलबार हस्ताक्षर गरेका छन् । विधयेकमा हस्ताक्षर गर्दै बाइडेनले अमेरिकाले युक्रेनका साहसी जनतालाई आफ्नो देशको रक्षाका लागि सहयोग गर्न तुरुन्तै अगाडि बढिरहेको नयाँ सहायताले देखाउने बताएका छन् ।
एउटा मुलुकका रुपमा डेमोक्र्याट, रिपब्लिकन र स्वतन्त्र सबैजना एकसाथ आउनसक्ने र ठूला काम गर्नसक्ने कुरा अमेरिकी जनतालाई देखाउन सफल भएको बाइडेनले बताएका छन् । संयुक्त राज्य अमेरिकाको रुपमा सँगै काम गर्दा आफूहरुले गर्न नसक्ने कुनै पनि काम नरहेको बाइडेनले बताए ।
यो विधयेक सिनेटमा रिपब्लिकन सांसदहरुको सहायतामा पारित भएको थियो । सिनेटमा विधयेकका पक्षमा ६८ जनाले र विपक्षमा ३१ जनाले मतदान गरेका थिए । अमेरिकाको सरकार शटडाउन हुन नदिन तीनवटा विधयेकहरु पारित गरेलगत्तै ओम्निबस नामको यो विधयेक पारित गरिएको थियो । ओम्निबस विधयेकले गत अक्टोबरमा सुरु आर्थिक बर्ष २०२२ भरका लागि सरकार संचालन लगायतका लागि खर्च प्रदान गर्छ ।
यो विधयेकमा समेटिएको नयाँ कोषले युक्रेन र यस क्षेत्रका सहयोगीहरूलाई थप मानवीय, सुरक्षा र आर्थिक सहायता प्रदान गर्नेछ। सहायता प्याकेजको लगभग आधा रकम यस क्षेत्रमा सेना परिचालन गर्न र युक्रेनमा रक्षा उपकरण पठाउन प्रयोग गरिने छ ।
अमेरिकाले युक्रेनमा रुसको आक्रमण अघि र दौरानमा युरोपभरि हजारौं सेना तैनाथ गरेको छ। तर नेटेको सदस्य समेत नरहेको युक्रेनको भूमिमा सेना राख्न भने अमेरिका र यसका पश्चिमी सहयोगीहरू इच्छुक छैनन्।
प्याकेजको बाँकी आधार रकमले युक्रेनबाट भागेका शरणार्थीहरू र देश भित्र विस्थापित मानिसहरूलाई मानवीय सहायता प्रदान गर्नेछ । उक्त रकम आपतकालीन खाद्य सहायता सहित युक्रेन र छिमेकी देशहरूमा साइबर सुरक्षा र ऊर्जाका विषय सम्बोधन गर्ने आर्थिक आवश्यकताहरू पूरा गर्न खर्च गरिनेछ ।
यसैबीच युक्रेनी राष्ट्रपति भोलोदिमिर जेलेन्स्कीले बुधबार अमेरिकी संसदमा सम्बोधन गर्ने कार्यक्रम समेत तय भएको छ । उक्त सम्बोधनका क्रममा जेलेन्सीले नो फ्लाइ जोन जस्ता कदमहरूको लागि आव्हान गर्ने र लडाकू जेटको सहायताका लागि आव्हान गर्ने सम्भावना रहेको छ, जुन यस अगाडि बाइडेनले अस्वीकार गरेका थिए ।
