एसाइलममा आधारित ग्रिनकार्ड स्वीकृत हुन लाग्ने औषत अवधि ३८ महिना
प्रकाशित मिति : बैशाख २३, २०७९ शुक्रबार
एकबर्ष अगाडि एसाइलम स्वीकृत भएको आधारमा फाइल गरिएका ग्रिनकार्ड आवेदनमा निर्णय दिन युएससीआईएसले औषत ३८ महिना लगाउने गरेको छ । ८० प्रतिशत आवेदनहरु ३८ महिनाभित्र निर्णय हुने गरेको युएससीआईएसले जनाएको छ ।
३८ महिना औषत अवधि भएकाले कतिपय आवेदनमा निर्णय हुन यो भन्दा छोटो समय पनि लाग्न सक्छ । कतिपय आवेदनमा भने ३८ महिनाभन्दा पनि लामो समय लाग्नसक्छ ।
युएससीआईएसले नेब्रास्का सर्भिस सेन्टर र टेक्सास सर्भिस सेन्टरबाट एसाइलममा आधारित ग्रिनकार्डबारे निर्णय गर्दै आएको छ । एसाइलम स्वीकृत भएको एकबर्षपछि ग्रिनकार्ड आवेदनका लागि फाइल गर्न सकिने प्रावधान रहेको छ । अहिलेको अवस्था हेर्दा एसाइलम स्वीकृत भएको मितिले ग्रिनकार्ड प्राप्त गर्न झण्डै ४ बर्ष लाग्छ ।
ग्रिनकार्ड आवेदन दिएको ४६ महिनाभित्र पनि आवेदनबारे निर्णय नआएको खण्डमा युएससीआईएसमा अनलाइनमार्फत सोधपुछ गर्न सकिन्छ । समान्य अवधिभन्दा धेरै समय लागेका आवेदनबारे अनलाइनबाट सोधपुछ भएमा युएससीआईएसले विशेष कदम चाल्नेछ ।
आजको मिति हिसाब गर्ने हो भने सन् २०१८ को जुलाई ८ भन्दा अगाडि आवेदन दिएका ग्रिनकार्ड आवेदनका सन्दर्भमा युएससीआईएसमा सोधपुछ गर्न सकिन्छ ।