चुनावको दिन शुक्रबार कसरी विमानस्थलबाट आवतजावत गर्ने ?
प्रकाशित मिति : बैशाख २८, २०७९ बुधबार
बैशाख ३० शुक्रबार चुनावको दिन निजी र सार्वजनिक यातायात बन्द रहनेछन् । मध्यरातदेखि सुरु भएको यातायात बन्द २४ घण्टासम्म जारी रहनेछ ।
यो अवस्थामा कसैलाई विमानस्थल जानुपरेमा र विमानस्थलबाट घरमा आउनुपरेमा कसरी आउने ? यो अवस्थामा नेपाल पर्यटन बोर्ड र पर्यटन प्रहरीले काठमाडौंको त्रिभुवन अन्तर्राष्ट्रिय विमानस्थलबाट आवातजावतका लागि हरियो नम्बर प्लेटको पर्यटकीय सवारी साधन प्रयोग गर्न विशेष छुट मागेको छ ।
विमानस्थलबाट निश्चित होटलहरुसम्म जानका लागि प्रतिव्यक्ति ३ सय रुपैया लिएर शटल बस सेवा उपलब्ध रहेको छ । जसका लागि विभिन्न ३ वटा रुटको व्यवस्था रहेको छ ।
पहिलो रुट विमानस्थलबाट नेपाल एयरलाइन्स, अन्नपूर्ण होटल, याक एण्ड यति होटल, ठमेल चोक, लैनचौर, शंकर होटल, एम्बासडर होटल हुँदै विमानस्थलसम्म रहेको छ । दोश्रो रुट विमानस्थलबाट होटल र्याडिसन, शांग्रिला होटल, नारायण गोपाल चोक, महाराजगञ्ज चोक, हायत होटल, चाबहिल चोक, द्वारिका होटलहुँदै विमानस्थल रहेको छ ।
तेश्रो रुट विमानस्थलबाट तिनकुने चोक, एभरेष्ट होटल, माइतिघर चोक, होटल हिमालय, शोल्टी होटल, ग्राण्ड होटलहुँदै विमानस्थलसम्म रहेको छ । यो रुटमा चल्ने शटल सेवा प्रयोग गरेर विमानस्थल आवतजावत गर्न सकिनेछ ।
थप जानकारी आवश्यक परेमा नेपाल पर्यटक यातायात व्यवसायी संघमा भरत प्रसाद तिमिल्सिनालाई ९८५१२३७३०२ र केदारनाथ कट्टेललाई ९८५१०७७४६८ मा सम्पर्क गर्न सकिन्छ । त्यस्तै पर्यटक बस संघका मिलन नेपाललाई ९८५११४८०५७ र प्रल्हाद लोहनीलाई ९८५१०९३९९८ मा सम्पर्क गर्न सकिनेछ ।
चुनावको दिनमा आन्तरिक उडान बन्द रहनेछ भने यात्रुहरुले पासपोर्ट, भिसा, हवाई टिकटका आधारमा शटल बस चढ्न पाउनेछन् ।