न्युयोर्क सिटीमा कागजपत्रविहिन र भिजिटरलाई समेत आउनेबित्तिकै स्वास्थ्य सेवा, ६ महिना बस्नु नपर्ने
प्रकाशित मिति : फाल्गुन १४, २०८० सोमबार
न्युयोर्क सिटीमा स्वास्थ्य सेवा लिनका लागि कम्तीमा ६ महिना बसोबास गरेको हुनुपर्ने प्रावधान हटाइएको छ । योसँगै न्युयोर्क सिटीमा कागजपत्रविहिन र भिजिटर लगायत जुनसुकै अध्यागमन स्टाटस भएकाहरुले पनि स्वास्थ्य सुविधा पाइरहेका छन् ।
न्युयोर्क सिटीको स्वास्थ्य सेवा कार्यक्रम एनवाईसी केयरले ६ महिना बसोबास गरेको हुनुपर्ने प्रावधान हटाएसँगै न्युयोर्क सिटीमा आउने विदेशमा जन्मेका व्यक्तिले आउनेबित्तिकै स्वास्थ्य सेवाको कार्यक्रममा सहभागी भएर लाभ लिनसक्छन् ।
स्वास्थ्य विमाका लागि योग्य नभएका वा स्वास्थ्यविमा लिन नसक्नेहरुका लागि एनवाईसी केयर नामको कार्यक्रमले निशुल्क र सस्तो स्वास्थ्य सेवा प्रदान गर्दछ । एनवाईसी हेल्थ एण्ड हस्पिटलमार्फत यो सेवा प्राप्त छ, जस अन्तरगत न्युयोर्क सिटीमा ११ वटा अस्पतालहरु रहेका छन् भने ३० वटा सामुदायिक स्वास्थ्य केन्द्रहरु रहेका छन् । ५ वटा दीर्घकालिन हेरचाह केन्द्र समेत छन् ।
अस्पतालहरुको सुची यहाँ हेर्नुहोला ।
सामुदायिक स्वास्थ्य केन्द्रको सुची यहाँ हेर्नुहोला ।
कागजपत्रविहिनहरु मेडिकेड र मेडिकेयरजस्ता स्वास्थ्य सुविधाका लागि योग्य नहुने भएकाले उनीहरुलाई यो कार्यक्रममा सहभागी भएर स्वास्थ्य लाभ लिनका लागि प्रोत्साहन गरिएको छ । यो कार्यक्रममा सहभागी भएर उपचार गर्दा सरकारका अन्य निकायसँग अध्यागमन स्टाटस वा अन्य संवेदनशील जानकारीहरु साझा नगरिने स्पष्ट पारिएको छ ।
जुनसुकै अध्यागमन स्टाटस र उपचारका लागि रकम तिर्न नसक्ने बिरामीहरुलाई समेत खुशीसाथ लिइने एनआईसी केयरका एलेक्स हन्टरले खसोखासलाई जानकारी दिए । नयाँ व्यक्तिलाई साइनअप गरेको दुईसाताभित्र प्राथमिक स्वास्थ्यजाँचका लागि अप्वाइन्टमेन्ट उपलब्ध गराइन्छ । कार्डियोलोजी, युरोलोजी लगायतका विशेष हेरचाह सेवाहरु समेत उपलब्ध रहेका छन् ।
२ सय भन्दा धेरै भाषामा अनुवाद सुविधा समेत रहेको छ । स्वास्थ्य सुविधा सातैदिन र चौबीसै घण्टा उपलब्ध रहेको छ । अधिकांश स्वास्थ्यकर्मीहरु आप्रवासी र आप्रवासीका सन्तान भएकाले उनीहरु अँग्रेजी बाहेकका अन्य भाषाहरु समेत बोल्ने भएकाले सहजरुपमा स्वास्थ्य उपचार गराउन सकिन्छ ।
यो कार्यक्रममा सहभागी हुनका लागि ६४६ ६९२ २२७३ मा फोन गर्न सकिनेछ । वा अस्पताल तथा स्वास्थ्य केन्द्रमा गएर पनि साइनअप गर्न सकिनेछ ।
त्यस्तै सहकार्य गरिरहेका सामुदायिक संस्थामा गएर पनि साइनअप गर्न सकिनेछ । न्युयोर्कको क्वीन्समा रहेको नेपाली र नेपाली भाषी आप्रवासीको हितमा सकृय संस्था अधिकार पनि यो कार्यक्रममा सहभागी रहेको छ ।
सामुदायिक संस्थाको सुची यहाँ हेर्नुहोला ।
मेट्रो प्लस इन्सुरेन्सका प्रतिनिधिमार्फत पनि साइनअप गर्न सकिन्छ ।