ग्रिनकार्ड पाउने नेपालीमा पुरुषभन्दा महिला धेरै, अविवाहित ग्रिनकार्डवाहक भने धेरैजसो पुरुष
प्रकाशित मिति : असार ३०, २०७९ बिहीबार
अमेरिकामा ग्रिनकार्ड पाउने नेपालीहरुमा पुरुषहरुको तुलनामा महिला धेरै भएको तथ्यांक डिपार्टमेन्ट अफ होमल्याण्ड सेक्युरिटीले सार्वजनिक गरेको छ । खसोखासले विगत ५ बर्षको तथ्यांकको विश्लेषण गर्दा हरेक बर्ष ग्रिनकार्ड पाउने नेपालीहरुमा पुरुषको तुलनामा महिलाहरु धेरै छन् । डिपार्टमेन्ट अफ होमल्याण्ड सेक्युरिटीले महिला पुरुषमात्र नभई विवाहित अविवाहित लगायतका श्रेणीहरु समेत छुट्याएर तथ्यांक सार्वजनिक गरेको छ ।
आर्थिक बर्ष २०२० मा ७ हजार ८ सय ४७ नेपालीहरुले अमेरिकाको ग्रिनकार्ड पाएकोमा ३८२१ पुरुष र ४०२६ महिला रहेका छन् । त्यसमा पनि २५ देखि ३४ बर्षका महिलाको संख्या उल्लेख्य छ । २०२० मा यो उमेर समुहका १६२८ नेपाली महिलाहरुले अमेरिकाको ग्रिनकार्ड प्राप्त गरेका छन् । यो उमेर समुहका नेपाली पुरुष १५११ जना रहेका छन् ।
ग्रिनकार्ड पाउनेहरुमा अधिकांश विवाहित रहेका छन् । २०२० मा ४८६७ विवाहित नेपालीले ग्रिनकार्ड पाएकोमा पुरुष २११३ र महिला २७५४ रहेका छन् । उक्त बर्ष २७६४ अविवाहित नेपालीले ग्रिनकार्ड पाएकोमा पुरुषहरु १६४६ र महिला १११८ रहेका छन् । अर्थात् अविवाहितकोमात्र अवस्था हेर्दा भने महिलाको तुलनामा पुरुषहरु धेरै छन् ।
२०१९ को तथ्यांक हेर्दा पनि कुल १० हजार २ सय १ नेपालीले ग्रिनकार्ड पाएकोमा महिला ५३०४ र पुरुषहरु ४८९६ रहेका छन् । यो बर्ष ग्रिनकार्ड पाउने विवाहित नेपाली ६ हजार २ सय ८६ रहेकामा ३५२९ महिला र २७५६ पुरुष छन् । ग्रिनकार्ड पाउने कुल अविवाहित ३६११ नेपालीमा महिला १५३४ र पुरुष त्योभन्दा धेरै २ हजार २७ जना रहेका छन् ।
त्यस्तै २०१८ को तथ्यांक हेर्दा कुल ११ हजार ९ सय ५३ नेपालीले ग्रिनकार्ड पाएकोमा महिला ६२२० र पुरुषहरु ५७३३ रहेका छन् । यो बर्ष ग्रिनकार्ड पाउने विवाहित नेपाली ६ हजार ९ सय ६१ रहेकामा ३९९६ महिला र २९६५ पुरुष छन् । ग्रिनकार्ड पाउने कुल अविवाहित ४६७५ नेपालीमा महिला १९७१ र पुरुष त्योभन्दा धेरै २ हजार ७ सय ४ जना रहेका छन् ।
आर्थिक बर्ष २०१७ को तथ्यांक हेर्दा कुल ११ हजार ६ सय १० नेपालीले ग्रिनकार्ड पाएकोमा महिला ५९०४ र पुरुषहरु ५७०६ रहेका छन् । यो बर्ष ग्रिनकार्ड पाउने विवाहित नेपाली ६ हजार ६ सय ११ रहेकामा ३७५६ महिला र २८५५ पुरुष छन् । ग्रिनकार्ड पाउने कुल अविवाहित ४६६९ नेपालीमा महिला १८९९ र पुरुष त्योभन्दा धेरै २ हजार ७ सय ७० जना रहेका छन् ।
आर्थिक बर्ष २०१६ को तथ्यांकमा १२ हजार ८ सय ५१ नेपालीहरुले अमेरिकाको ग्रिनकार्ड पाएका छन् । जसमध्ये महिलाहरु ६६६५ र पुरुषहरु ६१८४ रहेका छन् । अन्य २ जना छन् । यो बर्ष ७ हजार ४१ विवाहितहरुले ग्रिनकार्ड पाएकोमा ४ हजार १४ महिला र ३ हजार २७ पुरुष छन् । ग्रिनकार्ड पाउने कुल अविवाहित ५ हजार ३ सय १४ मध्ये २३१७ महिला र पुरुष त्योभन्दा धेरै २९९७ जना रहेका छन् ।
