अमेरिकी सांसद ज्याकी वालोर्स्कीको कार दुर्घटनामा निधन
प्रकाशित मिति : श्रावण १८, २०७९ बुधबार
अमेरिकी सांसद ज्याकी वालोर्स्कीको बुधबार कार दुर्घटनामा मृत्यु भएको छ । ५८ वर्षकी वालोर्स्की इण्डियाना राज्यको सेकेण्ड डिस्ट्रिक्टबाट अमेरिकी संसदको प्रतिनिधिसभामा प्रतिनिधित्व गर्ने रिपब्लिकन सांसद हुन् ।
उनको साथमा रहेका अन्य २ जना सहयोगीहरुको पनि दुर्घटनामा निधन भएको छ । वालोर्स्कीको मृत्युबारे एल्कर्ट काउन्टी शेरिफको कार्यालयले परिवारलाई जानकारी दिएको थियो । उनी आफ्नो प्रभु र मुक्तिदाता येशू ख्रीष्टसँग रहन पृथ्वीबाट प्रस्थान गरेर घर फर्केको वक्तव्यमा जनाइएको छ ।
उनी सन् २०१२ बाट सांसदमा निर्वाचित हुँदै आएकी छिन् । सदन ग्रीष्मकालीन छुट्टीमा रहेको बेलामा सांसदहरू प्रायः आफ्नो डिस्ट्रिक्टमा पुग्ने गर्छन् । यसै क्रममा उनी पनि आफ्नो डिस्ट्रिक्टमा थिइन् ।
उनी क्यापिटल हिलमा सांसदमा निर्वाचित हुनु अघि इंडियाना राज्य संसदमा तीन कार्यकाल सेवा गरेकी थिइन् । रोमानियामा मिसनरीको रूपमा चार वर्ष बिताएकी उनले त्योभन्दा अगाडि टेलिभिजन रिपोर्टरको रूपमा समेत काम गरेकी थिइन् ।