अमेरिकी हाउस स्पीकर न्यान्सी पेलोसीका पति पललाई ५ दिनको जेल सजाय, ३ बर्षको निरीक्षण
प्रकाशित मिति : भाद्र ७, २०७९ मंगलबार
अमेरिकी प्रतिनिधिसभाकी सभामुख न्यान्सी पेलोसीका पतिलाई मादक पदार्थ सेवन गरेर गाडी चलाएर दुर्घटना गराएको अभियोगमा ५ दिनको जेल सजाय तोकिएको छ । उनलाई ३ बर्षका लागि निरीक्षणमा राखिने भएको छ । क्यालिफोर्नियामा गत मेमा भएको दुर्घटनासँग सम्बन्धित आरोप पलले मंगलबार स्वीकार गरेका छन् ।
पल पेलोसीले पहिले नै दुई दिन जेलमा विताइसकेका छन् भने अन्य दुई दिनको लागि आचरण क्रेडिट पाएको नापा काउन्टी सुपीरियर कोर्टका न्यायाधीश जोसेफ सोल्गाले बताएका छन् । पल पेलोसीले एक बाँकी दिनको सट्टामा अदालतमा आठ घण्टा काम गर्ने भएका छन् ।
राज्यको कानूनले मादक पदार्थ सेवन गरेर गाडी चलाएको अपराध गरेका प्रतिवादीहरूलाई उनीहरूको वकील मार्फत उपस्थित हुन अनुमति दिन्छ । आफ्नो प्रोबेशनको एक भागको रूपमा पल पेलोसीले तीन महिनाको ड्राइभर क्लासमा उपस्थित हुनु पर्नेछ ।
त्यस्तै उनले गाडीमा इग्निशन इन्टरलक यन्त्र जडान गर्नुपर्नेछ । जहाँ उनले गाडीको इन्जिन सुरु हुनु अघि मादक पदार्थ सेवन गरे नगरेको चेक गर्न सासको नमूना प्रदान गर्नुपर्नेछ । उनले करिब ७ हजार डलर जरिवाना पनि तिर्नुपर्नेछ ।
सान फ्रान्सिस्कोको उत्तरमा नापा काउन्टीमा मे २८ मा भएको दुर्घटनापछि पल पेलोसीलाई पक्राउ गरिएको थियो । उनको मादक पदार्थ परीक्षण गर्दा रगतमा अल्कोहलको मात्रा शुन्य दशमलव ०८२ प्रतिशत रहेको देखाएको थियो, जुन कानुनी सीमाभन्दा माथि हो ।
राति १० बजेपछि दुर्घटना स्थल पुगेका अधिकारीहरूले युन्टभिलको वाइन कन्ट्री टाउन नजिकै पेलोसीलाई २०२१ पोर्शे क्यारेराको ड्राइभरको सिटमा र अर्को ड्राइभरलाई स्पोर्टस युटिलिटी सवारीसाधन बाहिर उभिरहेको भेटाएका थिए ।
क्यालिफोर्निया राजमार्ग गस्ती अधिकारीहरूका अनुशार पेलोसीका खुट्टा लडखडाइरहेका थिए भने उनको बोली अस्पष्ट थियो । साथै उनीबाट रक्सीको कडा गन्ध आइरहेको थियो । दुर्घटनामा अर्को गाडीका ४८ बर्षका चालक घाइते भएका थिए ।
पक्राउपछि पेलोसीलाई ५ हजार डलर जमानतमा रिहा गरिएको थियो । न्यान्सी पेलोसी त्यो बेला ब्राउन युनिभर्सिटीमा सम्बोधन गर्न रोड आइल्याण्डमा थिइन् ।