न्युयोर्कको ब्रुकलिन समुद्री तटमा साढे ३ महिनाकी बालिकासहित ३ बालबालिकाको शव फेला
प्रकाशित मिति : भाद्र २८, २०७९ मंगलबार
न्युयोर्कको ब्रुकलिन समुद्री तटमा ३ बालबालिकाको शव फेला परेको छ । अधिकारीहरूले मृत्युको अनुसन्धान गरिरहेका छन् ।
ती बालबालिकाहरु सोमबार समुन्द्री किनारमा मृत फेला परेका थिए । परिवारका एक सदस्यले उनीहरूको सुरक्षाको बारेमा चिन्ता व्यक्त गरेपछि खोजी गर्दा उनीहरुको शव भेटिएको हो ।
मृतक भेटिनेमा ७ वर्षीय बालक, ४ वर्षीया बालिका र एक साढे तीन महिनाकी बालिका समेत छन् । उनीहरुको शव ब्रुकलिनको कोने आइल्याण्डमा फेला परेको थियो ।
ती बालबालिकाकी आमा एउटी ३० वर्षीया महिला भएको र उनको मनोवैज्ञानिक मूल्याङ्कन भइरहेको प्रहरीले जनाएको छ । उनलाई प्रहरीले सोधपुछ गरेको थियो । उनलाई सोमबार बिहान कोने आइल्याण्डको छेउमा रहेको ब्राइटन बीचमा भेटिएपछि अस्पताल भर्ना गरिएको थियो ।
उनलाई कुनै अपराधको आरोप लगाइएको छैन । बालबालिकामाथि यस अगाडि दुर्व्यवहार वा बेवास्ताको कुनै संकेत छैन ।
प्रहरीले सोमबार परिवारकै सदस्यबाट ९११ मा फोन कल प्राप्त गरेको थियो । तीन साना बच्चाहरूलाई आमाले हानि पुर्याएको हुनसक्ने भन्दै फोन आएको थियो ।
प्रहरी अपार्टमेन्टमा पुग्दा आफूलाई तीन बच्चाहरू मध्ये एकको बुबा बताउने व्यक्तिले आफू चिन्तित भएको बताएका थिए । ती महिला र तीन बालबालिका कोने आइल्याण्डको बोर्डवाकमा रहेको ती व्यक्तिले प्रहरीलाई बताएका थिए ।
त्यसपछि करिब ९० मिनेटसम्म प्रहरी अधिकारीहरूले समुद्र तट, सडक र स्थानीय अस्पतालमा खोजी गरेका थिए । त्यसपछि अर्को फोनकल आयो । प्रहरी घटनास्थलमा पुग्दा महिलालाई भेटाएका थिए । तर त्यहाँ बालबालिकाहरु थिएनन् ।
जमिन, हवाइ र बन्दरगाह इकाइहरू मार्फत खोजी जारी थियो। झण्डै ३ घण्टापछि अधिकारीहरूले बच्चाहरूलाई कोने आइल्याण्डको समुन्द्री किनारमा अचेत अवस्थामा फेला पारे ।
बच्चाहरू फेला परेको स्थान र महिला फेला परेको स्थान करिब २ माईलको फरकमा रहेको छ । उक्त स्थान उनको अपार्टमेन्टको आधा माइल दक्षिणमा छ।