अमेरिकामा जेल पेमेन्टबाट आफ्नै एकाउन्टमा रकम पठाउन लगाएर ठग्नेहरु सकृय
प्रकाशित मिति : भाद्र २९, २०७९ बुधबार
अमेरिकामा जेल पेमेन्ट (Zelle®) बाट आफ्नै एकाउन्टमा रकम पठाउन लगाएर ठग्नेहरु सकृय भएका छन् । बैंक अफ अमेरिकाले ठगहरु सकृय रहेको भन्दै ग्राहकहरुलाई सचेत गराएको छ ।
जेल आफूले चिन्ने र विश्वास गर्ने मानिसहरूलाई पैसा पठाउने र प्राप्त गर्ने छिटो र सजिलो तरिका हो। अहिले यही तरिका अपनाएर ठगहरुले निशाना बनाइरहेका छन् । बैंक अफ अमेरिकाले जेल प्रयोग गरेर पैसा पठाउनका लागि कोहीपनि ग्राहकलाई अनुरोध नगर्ने वा फ्रड समाधानका लागि कोडहरु नमाग्ने स्पष्ट पारेको छ ।
कसरी निशाना बनाइरहेका छन् ठगले ?
तपाईंले फोनमा मेसेज प्राप्त गर्नुहुन्छ जसमा तपाईंको बैंकबाट असामान्य गतिविधिको बारेमा फ्रड चेतावनी जस्तो देखिन्छ। यो मेसेज ठगहरुले नै पठाएका हुन्छन् । मेसेजमा तपाईले फलानो स्टोरबाट यो रकम तिरेर सामान किन्नुभएको हो ? भन्ने प्रकारको विवरण उल्लेख हुन्छ । उदाहरणका लागि तपाईले मेसिज स्टोरबाट ५ सय डलरको सामान किन्नुभएको हो ? भनेर प्रश्न सोधिएको हुनसक्छ ।
यदि तपाईंले यो मेसेजको जवाफ दिनुभयो तपाईं अब ठगको जालोमा प्रवेश गर्नुभयो । तपाईले बैंकबाट आएको जस्तो देखिने नम्बरबाट कल प्राप्त गर्नुहुनेछ । कलर आइडीमा बैंककै नम्बर देखिएपनि यो ठगहरुले नक्कली कलर आईडी बनाएर गरेको नम्बर हो ।
फोनमा उनीहरुले आफू बैंकको प्रतिनिधि भएको बताउँछन् । उनीहरुले तपाईंलाई जेल आफ्नै एकाउन्टमा पैसा पठाउन लगाएर ठगी रोक्न मद्दत गर्ने प्रस्ताव गर्नेछन्। यो प्रस्ताव मान्नुभएको खण्डमा तपाई ठगिनबाट अझ नजिक पुग्नुभयो ।
उनीहरुले तपाईको नम्बर वा इमेल नै प्रयोग गरेर आफ्नो जेल एकाउन्ट सेटअप गर्न प्रयास गर्छन् । त्यो बेला बैंकबाट तपाईको फोनमा एउटा कोड आउँछ । यो कोड चाँही बैंकले नै पठाएको हुन्छ । किनभने ठगले तपाईको नम्बर वा इमेल प्रयोग गरिसकेकाले प्रमाणिकरणका लागि बैंकले यो कोड पठाउँछ ।
उनीहरुले यो कोड माग्छन् । यदि तपाईंले तिनीहरूलाई यो कोड दिनुभयो ठगहरुले तपाईंको इमेल वा फोन नम्बर प्रयोग गरेर आफ्नो बैंक खाता जेलमा दर्ता गर्नेछन् । त्यसपछि उनीहरुले तपाईकै फोन नम्बर वा इमेलमा पैसा पठाउन लगाउनेछन् । तपाईले जेलबाट आफ्नै इमेल वा फोन नम्बरमार्फत पैसा पठाउनुभएको खण्डमा उक्त रकम अब उनीहरुको खातामा जानेछ ।
यस्तोप्रकारको ठगीबाट बच्नका लागि बैंककै नम्बरबाट आएको कलर आईडीलाई पनि विश्वास नगर्नुहोला । तपाईले कसैले फोनमा आएको कोड मागेमा उक्त कोड नदिनुहोला । तत्कालै दवावमा कुनै कदम नचाल्नुहोला । फोन काटेर तपाईले आफै बैंकमा फोन गर्नुहोला । तपाईले आफै बैंकमा फोन गरेर यसबारे बुझ्न सक्नुहुनेछ ।