१४ वर्षमा अमेरिकामा पीएचडी गर्दै गरेका ट्यानरलाई गोफण्डमीमा ५५ हजार डलर सहयोग
प्रकाशित मिति : आश्विन ३१, २०७९ सोमबार
१४ वर्षको उमेरमा अमेरिकामा पीएचडी गदै गरेका बालक इलियट ट्यानरलाई सघाउन गोफण्डमीमा ५५ हजार डलर संकलन भएको छ । ९० हजार डलरको लक्ष्य सहित सुरु गरिएको गोफण्डमीमा ५५ हजार डलर संकलन भएको हो ।
इलियटले अमेरिकाको मिनेसोटा विश्वविद्यालयबाट पीएचडी गर्दैछन्। विश्वविद्यालयमा इलियटका साथीहरू थोरै छन्। उनका साथीहरु उमेर र अनुभवमा इलियटभन्दा धेरै जेठा छन् ।
उनी यसै वर्ष पीएचडीका लागि विश्वविद्यालयमा भर्ना भएका हुन् । इलियटका लागि योभन्दा ठूलो खुशी अरू केही छैन। स्कूलदेखि कलेज र त्यसपछि विश्वविद्यालयसम्मका सिढीहरु इलियटले पार गरेका छन्। इलियटले १३ वर्षको उमेरमा आफ्नो स्नातक पूरा गरेका थिए ।
इलियटले आफ्नो कलेजको करियर ९ वर्षको उमेरमा सुरु गरेका थिए। त्यसपछि उनले मिनेसोटाको ब्लूमिङ्टनमा रहेको स्थानीय सामुदायिक कलेजमा कक्षा लिन थाले।
अन्य विद्यार्थीहरू सुरुमा इलियटसँग कक्षामा देखेर छक्क परेका थिए। यो बच्चा आफ्नो कक्षामा के गर्न आएको हो भनी सोच्न थालेका थिए । यद्यपि तिनीहरूले इलियट सानै भए पनि क्षमतामा धेरै भारी रहेको कुरा बिस्तारै बुझे ।
इलियटले अध्ययनको अनुभव धेरै पटक बताएका छन् । एक वा दुई हप्तासम्म विद्यार्थीहरूले उनलाई हेरिरहन्थे। यति सानो उमेरमा कसैले कलेजमा कसरी पुग्न सक्छ भन्ने विश्वास नै गर्दैनथे । बिस्तारै सबै सामान्य भयो। सुरुमा कक्षामा प्रवेश गर्दा मानिसहरु वाहवाही गर्थे ।
उनको विशेष क्षमता इलियटको परिवारलाई थाहा छ । उनलाई यो प्रकृतिले दिएको उपहार हो । उनी सानैदेखि गणितका कठिन समस्याहरू हल गर्थे। इलियट ६ वर्षको हुँदा उनी मेन्सा इन्टरनेशनलको सदस्य बने। तर इलियट विश्वको ध्यानमा तब आए जब १३ वर्षको उमेरमा उनले भौतिकशास्त्रमा स्नातक तह पूरा गरे। यसपछि इलियट मिडियाको चर्चामा आए ।
उनी एक प्रतिभाशाली वैज्ञानिक बन्न चाहन्छन्। युनिभर्सिटीको प्रतिष्ठित पीएचडी कार्यक्रममा भर्ना हुन पाउनु इलियट र उनका आमाबाबुको लागि ठूलो आनन्दको क्षण थियो। तर, आफ्नो सन्तान यति छिट्टै पीएचडीमा पुग्ने कुरामा उनीहरु विश्वस्त थिएनन् । इलियटकी आमा मिशेलका अनुसार छोराको भर्नाका लागि २० हजार डलर जुटाउनु नै ठूलो चुनौती थियो।
उनले अनुदान र छात्रवृत्तिको विकल्प खोज्न थाले। तर कुनै उपाय लागेन । त्यसपछि परिवारले अन्तिम प्रयासका रूपमा रकम जुटाउन अपिल गरे । त्यसपछि गोफण्डमीमार्फत धेरै व्यक्तिहरूले इलियटको शिक्षाको लागि सहयोग गरिरहेका छन् ।