न्युयोर्कको वर्ल्ड ट्रेड सेन्टर ट्रेन स्टेशनमा तरबार प्रहारपछि भागाभाग, आक्रमणकारी फरार
प्रकाशित मिति : कार्तिक ३, २०७९ बिहीबार
न्युयोर्कको तल्लो म्यानहट्टन सबवे स्टेशनमा तरवारले प्रहार गरेपछि यात्रुहरूमा त्रास फैलिएको छ । प्रहरीले घटनाबारे अनुसन्धान गरिरहेको जनाएको छ ।
आज विहान साढे ९ बजे ए, ई र सी ट्रेनको लाईनमा चेम्बर्स स्ट्रीट सबवे स्टेशनको सिँढीमा घटना भएको हो । यो स्टेशन वर्ल्ड ट्रेड सेन्टर ट्रान्जिट हब कम्प्लेक्सको हिस्सा हो।
तरवारको ब्लेड देखिएको थिएन तर तरवारको खोलले पीडितको अनुहार काटेको प्रहरीले जनाएको छ । घाइतेलाई स्थिर अवस्थामा अस्पताल लगिएको छ भने उनी निको हुने अपेक्षा गरिएको छ ।
आक्रमणकारीलाई यो समाचार तयार पार्दासम्म प्रहरीले पक्राउ गरेको छैन । आक्रमणकारीले कालो पोशाक लगाएको प्रहरीले जारी गरेको विवरणमा उल्लेख छ ।
सुरुमा घटना ट्रेनभित्र भएको वा प्लेटफर्ममा भएकोबारे प्रहरी निश्चित थिएन। रेल स्टेशनमा पुग्ने बित्तिकै मानिसहरूबीच भागाभाग भएको थियो ।