२ बिलियनको पावरबल लोटरीका विजेता नम्बरहरु सार्वजनिक
प्रकाशित मिति : कार्तिक २२, २०७९ मंगलबार
प्राविधिक समस्याहरूका कारण सोमबार राती समयमा खोल्न ढिलो भएको पावरबल लोटरी ज्याकपटका विजयी नम्बरहरू सार्वजनिक गरिएको छ । अत्याधिक टिकट खरिदपछि १ दशमलव ९ बिलियनको पावरबल २ दशमलव १ बिलियन डलर पुगेको थियो ।
मंगलबार विहान गरिएको घोषणा अनुशार विजेता नम्बरहरुमा १०, ३३, ४१, ४७ र ५६ रहेका छन् भने पावरबल नम्बर पनि १० नै रहेको छ । आवश्यक सुरक्षा प्रोटोकलहरू पूरा गर्न थप समय चाहिने भन्दै सोमबार लोटरी खोल्नमा ढिलाइ भएको थियो। मंगलबार विहानमात्र नम्बरहरु सार्वजनिक गरिएको छ ।
यो पावरबल ज्याकपट विश्वकै अहिलेसम्मको ठूलो राशीको लोटरी हो । अर्थात् यति धेरै राशीको लोटरी पुगेको अहिलेसम्मकै इतिहासमा विश्वमा पहिलो हो ।
गिनिज बुकमा विश्वकै सबैभन्दा ठूलो राष्ट्रिय ज्याकपटमा जनवरी २०१६ को पावरबल रहेकोमा उक्त रेकर्ड पनि तोडिएको हो । त्यतीबेला १ दशमलव ५८६ बिलियन डलरको ज्याकपट खोलिएको थियो । जो अमेरिकाभर तीनजनाले जीतेका थिए ।
पावरबल लोटरी विजेताहरूले एकमुष्ठ पुरस्कार प्राप्त गर्ने वा २९ बर्षमा ३० पटकगरी पुरस्कार प्राप्त गर्ने योजनाबीच छनौट गर्न सक्छन् । एकमुष्ठ भुक्तानी चर्चा गरिएभन्दा कम हुन्छ तर अधिकांशले एकमुष्ठ भुक्तानीकै विकल्प रोज्छन् ।
जितेको रकममा २४ प्रतिशत अनिवार्य संघीय ट्याक्स विथहोल्ड हुन्छ भने एकल करदाताले शीर्ष संघीय सीमान्त दर ३७ प्रतिशत पनि तिर्नुपर्छ । त्यसपछि राज्य र सिटीका करहरु पनि तिर्नुपर्छ । उक्त करको दर विजेता कहाँ बस्छन् र उनीहरूले जित्ने टिकट कहाँ किनेका थिए भन्ने आधारमा निर्धारण हुन्छ । न्युयोर्कमा ८ दशमलव ८२ प्रतिशत राज्यलाई र ३ दशमलव ८७६ प्रतिशत सिटीलाई बुझाउनुपर्छ ।
पावरबल चिठ्ठा अमेरिकाका ४५ वटा राज्यहरुमा खेल्न सकिन्छ । साथै वासिंटन डिसी, पोर्तोरिको र युएस भर्जिन आइल्याण्डमा पनि खेल्न सकिन्छ ।
यो टिकटको मूल्य २ डलर रहेको छ । खेल्ने व्यक्तिले १ देखि १ देखि ६९ सम्मका ५ वटा नम्बर र १ देखि २६ सम्मको एउटा नम्बर छनौट गर्नुपर्छ ।