६ गोल गर्दै पोर्चुगल क्वार्टरफाइनलमा, २१ बर्षका रामोस एक्लैले गरे ३ गोल
प्रकाशित मिति : मंसिर २०, २०७९ मंगलबार
स्वीट्जरल्याण्डलाई ६ -१ को फराकिलो अन्तरले पराजित गर्दै पोर्चुगल क्वार्टरफाइनलमा प्रवेश गरेको छ । अफ १६ को खेलमा पहिलो हाफमै २ गोल गरेको पोर्चुगलले खेलको अन्तिमसम्म ६ गोल गर्न सफल भयो ।
खेलको १७ औं मिनेटमा २१ वर्षीय गोन्कालो रामोसले पोष्टको माथिल्लो कुनामा गोल गर्न सफल भए । ३२औं मिनेटमा पेपेले पोर्चुगलको कर्नर किकमा गोल गर्दै टोलीको अग्रता दोब्बर बनाए ।
पोर्चुगलका रामोसले ५१ औं मिनेटमा गोल गर्दै आफ्नो टोलीलाई ३-० को अग्रता दिलाए । यो उनले गरेको दोश्रो गोल थियो । लगत्तै पोर्चुगलका तर्फबाट राफेल गुरेइरोले चौथो गोल गरे, त्यो पनि रामोसकै सहयोगमा ।
स्वीट्जरल्याण्डले पनि हार भने मानेको थिएन । म्यानुअल अकान्जीले गोल गर्दै पोर्चुगलसँगको गोल अन्तर घटाए ।
खेलको ६६ औं मिनेटमा पोर्चुगलका गोन्कालो रामोसले तेस्रो गोल गर्दै टोलीलाई ५-१ को अग्रता दिलाए । पोर्चुगलका लागि क्रिस्टियानो रोनाल्डो ७३औं मिनेटमा खेलमा प्रवेश गरेका थिए ।
स्टपेज टाइममा पनि पोर्चुगलले थप गोल गर्न सफल भयो । पोर्चुगलका राफेल लियोले छैटौं गोल गरे ।
यस अगाडिको खेलमा पेनाल्टी सुटआउटमा स्पेनविरुद्ध मोरक्को विजयी भएको थियो ।
निर्धारित ९० मिनेट र अतिरिक्त समयको दुई १५ मिनेटपछि पनि मोरक्को र स्पेन बराबरी भएपछि राउन्ड अफ १६ खेलको निर्णय पेनाल्टी शुटआउटबाट गरिएको थियो ।
पेनाल्टी शुटआउटमा मोरक्को तीनगोल गर्न सफल भयो भने स्पेनले कुनै गोल गर्न सकेन ।
मोरक्कन गोलकिपरले अनगिन्ती आक्रमणहरू सहित स्पेनका तीन शटहरू बचाउन सफल भए । जसले गर्दा मोरक्कोलाई क्वार्टर फाइनलमा पुग्नको लागि मौका दियो ।
मोरक्कोका अब्देलहामिद साबिरी, हाकिम जियेच र अचराफ हाकिमीले सबैले गोल गरे । र स्पेनलाई पछि पार्दै विश्वकप २०२२ को क्वार्टरफाइनलको यात्रा तय गरे ।