अरुणाचलमा भारत र चीनका सेनाबीच झडप, कैयन सेना घाइते
प्रकाशित मिति : मंसिर २६, २०७९ सोमबार
अरुणाचल प्रदेशको तवाङ सेक्टरमा भारत र चीनका सैनिकबीच झडप भएको छ । भारतीय सेनाका प्रवक्ताका अनुशार यो झडप डिसेम्बर ९ मा भएको थियो।
चीनको पीएलएका सेना अरुणाचल प्रदेशको तवाङ सेक्टरमा प्रवेश गरेपछि भारतले जवाफी कारबाही गरेको जनाएको छ ।
यो झडपमा दुवै पक्षका केही सैनिक घाइते भएका छन् ।
भारतीय सेनाका अनुसार दुवै देशका सैनिक तत्काल घटनास्थलबाट पछि हटेका थिए । झडपपछि शान्ति स्थापनाका लागि उक्त क्षेत्रका कमाण्डरले चिनियाँ समकक्षीसँग वार्ता गरेका थिए ।
भारतको प्रमुख अंग्रेजी पत्रिका द हिन्दूले भारतीय रक्षा अधिकारीहरूलाई उद्धृत गर्दै अरुणाचलको तवाङमा भएको झडपमा भारतीय सैनिकभन्दा चिनियाँ सैनिक बढी घाइते भएको जनाएको छ ।
लद्दाखको गलवान उपत्यकामा १५ जुन २०२० मा दुई देशका सैनिकहरूबीच भएको हिंसात्मक झडपपछि यो पहिलो घटना हो। त्यसबेला २० भारतीय सैनिक मारिएका थिए भने धेरै घाइते भएका थिए ।
चीनले पनि कुनै भनाई जारी गरेको छैन। चीनले गलवान हिंसामा मारिएका आफ्ना सैनिकहरूलाई श्रद्धाञ्जली अर्पण गरेको थियो ।
तवाङमा चिनियाँ सैनिकसँग झडपको खबरलाई लिएर कांग्रेसले भाजपा सरकारलाई निशाना बनाउँदै आफ्नो ढुलमुले मनोवृत्ति छोड्न आग्रह गरेको छ।ढुलमुले मनोवृत्ति छोडेर चीनलाई कडा स्वरमा जवाफ दिने बेला आएको कांग्रेसले जनाएको छ ।
