३ बिलियन डलर हिनामिनापछि बहामसमा बसेका क्रिप्टो सेलिब्रेटी साम बैंकम्यान फ्राइड पक्राउ
प्रकाशित मिति : मंसिर २६, २०७९ सोमबार
पतन भएको क्रिप्टोकरेन्सी एक्सचेन्ज एफटीएक्सका संस्थापक साम बैंकम्यान फ्राइडलाई सोमबार बहामासमा पक्राउ गरिएको छ । अमेरिकी अभियोजनकर्ताहरुले उनी विरुद्ध अभियोग दायर गरेपछि अमेरिकाको अनुरोधमा उनलाई पक्राउ गरिएको हो ।
क्रिप्टोकरेन्सी संसारलाई हल्लाएको घटना यो पछिल्लो विकाश हो । प्रहरीले साँझ ६ बजेपछि बैंकम्यान फ्राइडलाई बहामासको नासाउमा रहेको उनको अपार्टमेन्ट कम्प्लेक्समा पक्राउ गरेको थियो। उनी मंगलबार बहमानियाको अदालतमा उपस्थित हुनेछन्।
यो गिरफ्तारीले बैंकम्यान फ्राइड र एफटीएक्सको अनुसन्धानमा ठूलो कदम हो । संस्थापक फ्राइड र उनको कम्पनी नोभेम्बर देखि गहन छानबीनमा परेको छ ।
कम्पनीले आफ्ना सेवाग्राहीलाई कम्तिमा ३ बिलियन तिर्नुपर्नेछ भने आफ्नो कोष निकाल्न सेवाग्राहीहरु असमर्थ भएका छन् । ग्राहकको कोषबाट रकम निकालेर अरु ठाउमा हालेकोबारे छानविन भइरहेको छ ।
३० वर्षीय क्रिप्टो सेलिब्रेटी बैंकम्यान फ्राइडविरुद्ध कस्तो कस्तो अभियोग लगाइनेछ भन्ने अझै स्पष्ट छैन । उनको कम्पनीमा कम्तिमा एक मिलियन निक्षेपकर्ताहरूलाई उनीहरूको कोषमा पहुँच गर्न असमर्थ भएपछि गत महिनादेखि यो विषय चर्किएको हो ।
बैंकम्यान फ्राइड विरुद्ध ठगी, जालसाजी षड्यन्त्र, धितोपत्र ठगी, धितोपत्र जालसाजी षड्यन्त्र र मनी लान्ड्रिंग लगायतका अभियोगहरू लगाइने श्रोतको भनाई छ । यदि आरोपहरू दुवै क्षेत्राधिकारमा कम्तिमा एक वर्षको जेल सजाय योग्य मानिएमा बहामाससँगको अमेरिकाको सुपुर्दगी सन्धिले अमेरिकी अभियोजनकर्ताहरूलाई प्रतिवादीहरूलाई अमेरिकी भूमिमा फिर्ता गर्न अनुमति दिन्छ ।
आफूले जानाजानी ठगी नगरेको तथा आफूले सोंचेजति आफू सक्षम नभएको उनले बताएका थिए ।
