न्युयोर्कमा खराब मौषमका कारण रातभर गाडीमा फस्नेमा कैयन नेपालीहरु समेत
प्रकाशित मिति : पुस ९, २०७९ शनिबार
न्युयोर्कको बफेलो क्षेत्रमा गाडीमा फस्नेमा कैयन नेपालीहरु समेत रहेका छन् । बफेलो क्षेत्रमा यात्रा गर्ने क्रममा र दैनिक कामका लागि आवतजावत गर्ने क्रममा उनीहरु गाडीमा फसेका थिए ।
बफेलो क्षेत्रमा काममा जाने क्रममा ५ जना नेपालीहरु हिजो दिउसो २ बजेदेखि फसेकोमा २६ घण्टापछि शनिबार दिउसो ४ बजेतिरमात्र सकुशल सुरक्षित स्थानमा पुगेको त्यहाँबाट लोकनाथ अधिकारीले जानकारी दिनुभयो । उनीहरु तेल बचाउन एउटै गाडीभित्र बसेका थिए भने २६ घण्टापछि गाडी त्यही छाडेर सुरक्षित स्थानमा पुग्न सफल भएका थिए ।
त्यस्तै बफेलो क्षेत्रहुँदै गन्तव्यमा जादै गरेका ४ जना नेपालीभाषीहरु पनि रातभर फसेका थिए । उनीहरु हिजो दिउसो ४ बजेदेखि बफेलोको साउथ पार्कमा फसेकोमा विहान ८ बजे गाडी छाडेर सुरक्षित स्थलमा पुग्न सफल भएका थिए । उनीहरुले त्यसक्षेत्रका नेपालीहरुलाई सम्पर्क गरेर उनीहरुको घरमा पुग्न सफल भएको जनाइएको छ ।
गाडीमा पेट्रोल हाल्ने क्रममा किनेको एककप कफी गाडीभित्र रहेकाले त्यही एककप कफी ४ जनाले बाँडेर खाएको भरमा उनीहरुले १६ घण्टा गाडीमा बिताएका थिए । गाडीमा तेल सकिएपछि उनीहरु गाडीबाट बाहिर निस्केर सुरक्षित स्थानमा पुग्न सफल भएका थिए । हिमपात र हावाहुरीका कारण आवागमनमा असर परेको र भिजिबिलिटी समेत नभएकाले समस्या भएको त्यहाँबाट लोकनाथ अधिकारीले जानकारी दिनुभयो ।
फसेका व्यक्तिले प्रहरीलाई खबर गर्दा प्रहरीले समेत केही गर्न नसक्ने बताएको थियो । प्रहरीले बासिन्दाहरूलाई उनीहरूको जीवन खतरामा नभएसम्म ९११ मा फोन गर्न निरुत्साहित गरेको छ । त्यसक्षेत्रमा कैयन नेपालीहरुका घरमा समेत विद्युत आपूर्तिमा अवरोध उत्पन्न भएको छ ।
खराब मौषमका कारण बफेलो लगायतका क्षेत्रहरु समेटिएको न्युयोर्कको एरी काउन्टीमा केहीसय मानिसहरू अझै पनि आफ्नो कारमा फसिरहेको अधिकारीहरुले बताएका छन् । हिजो राती र आज बिहान आफ्ना कारहरूमा फसेका एरी काउन्टीका बासिन्दाहरूलाई उद्धार गर्न उद्दारकर्मीहरुले प्रयास गरेका थिए ।
कडा बतास र हिमपातले काउन्टीलाई असर गरेको एरी काउन्टीका कार्यकारी मार्क पोलोनकार्जले बताएका छन् । आफूहरुले देखेका संख्याहरूको आधारमा यो सायद केही सयको वरपर रहेको उनको भनाई छ । त्यहाँ ५ सय वा त्योभन्दा बढी व्यक्ति फसेका थिए ।
काउन्टीले बासिन्दाहरूलाई सडकमा सवारी चलाउनबाट रोक्न चुनौतीहरूको सामना गरिरहेको छ । प्रतिबन्ध लगाइएको भए पनि बासिन्दाहरुले सडकमा गाडी चलाउन नरोकेको जनाइएको छ ।
एरी काउन्टीका उद्दारकर्मीहरुले व्यक्तिहरूलाई वार्मिङ सेन्टरहरूमा पुर्याउन सक्षम भएका छन् । ट्रान्जिट पुलिस, बफेलो एयरपोर्ट फायर र एयरफिल्ड टोलीहरूले फसेका गाडीसवारहरुलाई उद्धार गरेका छन् र लगभग ६० जनालाई आश्रय दिएका छन्।
एरी काउन्टीमा आपतकालिन कर्मचारीहरू चिकित्सा आपतकालिन समयमा घरमा पुग्न नसक्दा कम्तिमा दुई व्यक्तिको मृत्यु भएको छ ।