न्युयोर्कको क्वीन्समा बेसमेन्ट डेकेयरमा आगलागी हुँदा १८ बालबालिका घाइते
प्रकाशित मिति : माघ १२, २०७९ बिहीबार
न्युयोर्क सिटीको क्वीन्समा घरको बेसमेन्टमा रहेको डेकेयर सेन्टरमा बुधबार दिउँसो आगलागी हुँदा १८ बालबालिका घाइते भएका छन् । ७२ ड्राइभ, १४७ स्ट्रीट क्यु गार्डेन हिल्समा दिउँसो २ बजे पछि आगलागती भएको थियो ।
लिथियम आयन ब्याट्रीका कारण आगलागी भएको जनाइएको छ । फायर डिपार्टमेन्टले भवनबाट कुल १८ बालबालिकाहरुलाई उद्दार गरिएको र एकजनाको अवस्था गम्भिर रहेको जनाएको छ । १७ जना बालबालिकाहरु सामान्य घाइतेमात्र भएको र अवस्था स्थीर रहेको जनाइएको छ ।
अग्निनियन्त्रकहरु आएपछि करिब ४० मिनेटमा आगो नियन्त्रणमा लिइएको थियो । दुई तले एकल परिवार घरको बेसमेन्टमा एउटा डेकेयर र एउटा दन्त प्रयोगशाला रहेको थियो ।
निरीक्षण पछि अनुमति बिना बेसमेन्ट निर्माण गरेर व्यवसाय चलाएको पाइएको छ भने नगर अभिलेख विपरीत बेसमेन्ट रहेको भेटिएको छ । न्युयोर्क सिटीको भवन विभागले बेसमेन्टको उपयोग भण्डारणको लागी मात्र रहेको र दुई व्यवसाय सञ्चालनका लागि अनुमति नभएको जनाएको छ ।
सार्वजनिक सुरक्षाको हितमा र आगलागीबाट भएको क्षतिका कारण भवन पूर्णरुपमा खाली गराइएको छ । फायर डिपार्टमेन्टले घरहरूमा लिथियम आयन ब्याट्री चार्ज गर्ने खतराको बारेमा चेतावनी दिएको छ ।
स्कुटर र बाइकमा प्रयोग हुने लिथियम आयन ब्याट्रीका कारण विगत केही वर्षदेखि समस्या रहदै आएको र तिनीहरुलाई चार्ज गर्ने, ब्याट्री र चार्जिङ कर्ड नमिल्ने र कम गुणस्तरको ब्याट्री ल्याउनुपर्ने अवस्था रहेकाले घर वा अपार्टमेन्टको प्रवेशद्वारमा रातभर चार्ज गर्न नहुने फायर डिपार्टमेन्टले जनाएको छ । रातभर चार्ज गरेर नछाड्न तथा बन्द ढोकाको कोठामा जागा र सतर्क भएको अवस्थामा मात्र चार्ज गर्न सुझाव दिइएको छ ।