अमेरिकामा ग्रिनकार्डवाहकले अनिवार्य पालना गर्नैपर्ने ४ कर्तब्य
प्रकाशित मिति : माघ २१, २०७९ शनिबार
अमेरिकामा ग्रिनकार्ड वाहकले गर्नैपर्ने ४ कर्तब्यहरु छन्, जसको पालना अनिवार्यरुपमा गर्नुपर्छ ।
अमेरिकी कानूनको पालना
ग्रीन कार्डवाहकहरूले अमेरिकामा बस्दा सबै संघीयमात्र होइन, राज्य र स्थानीय कानूनहरू पनि पालना गर्नुपर्छ। जान अन्जानमा कानूनको उल्लंघनमा कसैलाई पनि छुट हुँदैन ।
ग्रीन कार्डवाहकहरु निश्चित आपराधिक अभियोगहरूबाट जोगिनै पर्छ, किनकि यसले देशनिकाला हुने र ग्रिनकार्ड गुम्नेसम्मको स्थिति आउन सक्छ।
कर तिर्नुहोस्
ग्रीन कार्ड वाहकहरूले संघीय, राज्य, र स्थानीय करहरू तिर्नु पर्छ, जुन अमेरिकी कानूनद्वारा आवश्यक छ। राज्य र स्थानीय करका नियमहरु फरकफरक हुनसक्ने भएकाले जुन स्थानमा बसेको छ, त्यहाँका करका नियमहरु जान्न आवश्यक छ ।
सेलेक्टिभ सर्भिसमा दर्ता
यदि तपाई १८ बर्षदेखि २५ बर्ष बीचको पुरुष हुनुहुन्छ भने अनिवार्यरुपमा अमेरिकी सेनाको सेलेक्टिभ सर्भिसका लागि आफूलाई दर्ता गर्नुपर्छ । २६ बर्ष पुगेको व्यक्तिले दर्ता गर्नुपर्दैन । यदि ग्रिनकार्डवाहकले सैन्य सेलेक्टिभ सर्भिसमा आफूलाई दर्ता गराएको छैन भने उसको ग्रिनकार्ड गुम्नसक्ने र पछि अमेरिकी नागरिकता नपाउनसक्ने खतरा समेत हुन्छ ।
सेलेक्टिभ सर्भिसमा दर्ता नगरेको व्यक्तिले अमेरिकी नागरिकता प्रकृयामा ५ बर्षसम्म ढिलो हुनसक्ने, संघीय, राज्य र स्थानीय सरकारमा जागिर खान नपाउने, संघीय तालिम, ऋण वा ग्रान्टहरु पनि लिन नपाउने हुनसक्छ । अमेरिका आएको ३० दिनभित्र सेलेक्टिभ सर्भिसमा दर्ता गर्नुपर्छ ।
ठेगाना परिवर्तनहरू रिपोर्ट गर्नुहोस्
यदि तपाई अमेरिका आइसकेपछि सुरुमा युएससीआईएसलाई दिएको ठेगाना परिवर्तन गरेर अरु स्थानमा बस्न थाल्नुभएको छ भने तपाईले ठेगाना परिवर्तनको जानकारी तुरुन्तै दिनुपर्छ । युएस पोष्टल सर्भिसमा ठेगाना परिवर्तन गर्दैमा युएससीआईएसमा ठेगाना परिवर्नत हुँदैन ।
युएससीआईएसमा ठेगाना परिवर्तनका लागि तपाईले फर्म एआर ११ को प्रयोग गर्नुपर्छ । यदि तपाईको युएससीआईएसमा अनलाइन एकाउण्ट छ भने अनलाइनमा यो फर्म भरेर ठेगाना परिवर्तन गर्न सकिन्छ । यदि छैन भने हुलाकमार्फत पठाउन सकिन्छ ।
कानुन अनुशार अमेरिकी नागरिकबाहेक अरु व्यक्तिले ठेगाना परिवर्तन गरेको १० दिनभित्र युएससीआईएसमा जानकारी गराउनुपर्छ । ग्रिनकार्डवाहकले अनलाइनमार्फत नै ठेगाना परिवर्तन गरेको जानकारी गराउन सक्छन् । तीसदिनभन्दा कम समय अमेरिकाभित्र गैरआप्रवासी भिसामा आउनेहरुले भने आफ्नो ठेगाना परिवर्तनबारे जानकारी गराउनु पर्दैन ।