प्रणालिगत जोखिमका कारण न्युयोर्क सिटीमा रहेको बैंक बन्द, इतिहासकै तेश्रो ठूलो बैंकिङ असफलता
प्रकाशित मिति : फाल्गुन २८, २०७९ आईतबार
अमेरिकी नियामकहरूले आइतबार न्यूयोर्कस्थित सिग्नेचर बैंक बन्द गराएका छन् । बैंकिङ संकट रोक्नका लागी क्रिप्टो उद्योगमा एक ठूलो ऋणदाताका रुपमा रहेको यो बैंक बन्द गराइएको हो ।
ट्रेजरी, फेडरल रिजर्भ, र एफडीआईसीले आइतवार साँझ संयुक्त विज्ञप्तिजारी गरेर उक्त बैंक बन्द गराएको घोषणा गरेका हुन् । बैंकिङ नियामकहरूले सिग्नेचर बैंकका डिपोजिटकर्ताहरूलाई आफ्नो डिपोजिटहरूमा पूर्ण पहुँच हुने बताएको छ । असफल सिलिकन भ्याली बैंकमा डिपोजिटकर्ताहरूलाई सुनिश्चित गर्नको लागि यस्तै कदम चालिएको थियो ।
सिग्नेचर बैंक क्रिप्टोकरेन्सी उद्योगको मुख्य बैंकहरू मध्ये एक हो । धितोपत्र फाइलिङ अनुसार डिसेम्बर ३१ सम्म सिग्नेचर बैंकको कुल सम्पत्ति ११० दशमलव ४ बिलियन र कुल डिपोजिट ८८ दशमलव ६ बिलियन थियो ।
क्षतिलाई रोक्न र ठूलो संकटबाट जोगाउन, फेड र ट्रेजरीले फेडको आपतकालीन ऋण प्राधिकरणको प्रयोग गरेर सिग्नेचर बैंक र सिलिकन भ्याली बैंक दुवैमा डिपोजिटहरू ब्याकस्टप गर्न आपतकालीन कार्यक्रम सिर्जना गरेको छ । अमेरिकामा सामान्यतया २ लाख ५० हजारसम्मको डिपोजिटमा बिमा गरिएको हुन्छ ।
सिग्नेचर बैंक न्यूयोर्क, कनेक्टिकट, क्यालिफोर्निया र नर्थ क्यारोलिना भरमा ३८ वटा निजी ग्राहक कार्यालयहरू भएको न्यूयोर्कमा आधारित वाणिज्य बैंक हो । यो बैंक सन् २००१ मा खोलिएको थियो ।
अमेरिकामा एकसातामा तीनवटा बैंक बन्द भएका छन् । शुक्रबार सिलिकन भ्याली बैंक बन्द हुनु अगाडि मार्च ९ मा सिल्भरगेट बैंक बन्द भएको थियो ।
तर आइतबार सिग्नेचर बैंक बन्द हुनु इतिहासकै तेश्रो ठूलो बैंकिङ असफलता हो । किनभने यस अगाडि आइतबार २०९ बिलियनको सम्पत्ति भएको सिलिकन भ्याली बैंक र सन् २००८ मा ३०७ बिलियन सम्पत्ति भएको वासिंटन म्युचुअल बैंक बन्द भएका थिए । त्यसपछि झण्डै ११८ बिलियन सम्पत्ति भएको सिग्नेचर बैंक असफल हुने बैंकमा तेश्रो ठूलो हो ।
अमेरिकाका बैंकहरुमा कतिसम्म रकम राख्नु सुरक्षित हुन्छ?
अमेरिकामा बैंक असफल भएपनि रकम डिपोजिट गर्नेहरुको २ लाख ५० हजार डलरसम्मको रकम सुरक्षित हुन्छ । फेडरल डिपोजिट इन्स्योरेन्स कर्पोरेशनले अमेरिकामा योग्य बैंकहरू र बचत संस्थाहरूमा २ लाख ५० हजार डलरसम्मको डिपोजिटको बीमा गर्छ।
तपाईले हरेक खाताका लागि २ लाख ५० हजार डलरसम्मको फरक फरक इन्सुरेन्स हुन्छ । यसको मतलब यदि तपाईंसँग व्यक्तिगत खाताहरू, संयुक्त खाताहरू, वा सेवानिवृत्ति खाताहरू जस्ता विभिन्न फक कोटिहरूमा खाताहरू छन् भने प्रत्येक खाताको २ लाख ५० हजार डलरसम्मको अलग अलग बीमा गरिन्छ।
यो थाहा पाउन महत्त्वपूर्ण छ कि सबै प्रकारका खाताहरू र डिपोजिटहरु फेडरल डिपोजिट इन्स्योरेन्स कर्पोरेशनको बीमाद्वारा कभर गरिएको हुदैन । उदाहरणका लागि, स्टक, बन्ड, म्युचुअल फण्ड जस्ता लगानीहरू फेडरल डिपोजिट इन्स्योरेन्स कर्पोरेशनद्वारा बीमा गरिएको हुदैन ।
फेडरल डिपोजिट इन्स्योरेन्स कर्पोरेशनले सेफ डिपोजिट बाकसहरूको पनि बीमा गर्दैन । न त यसले धोखाधडी वा चोरीको कारणले हुने हानिको लागि बीमा प्रदान गर्दछ।
यदि तपाइँसँग एउटामात्र बीमा गरिएको बित्तिय संस्थामा २ लाख ५० हजार डलर भन्दा बढी डिपोजिट छ भने तपाईले सबै डिपोजिट पूर्ण रूपमा बीमा गरिएको सुनिश्चित गर्न बैंक वा बचत संस्थामा प्रतिनिधिसँग कुरा गर्नु महत्त्वपूर्ण छ।
यदि तपाईंले धेरै बैंकहरूमा धेरै खाताहरू खोल्नुभएको छ भने प्रत्येक खातामा २ लाख ५० हजार डलरसम्मको विमा गरिएको हुन्छ । उदाहरणका लागि यदि तपाईंसँग एउटा बैंकमा खातामा २ लाख ५० हजारसम्म र अर्को बैंकमा २ लाख ५० हजारसम्म डिपोजिट छ भने प्रत्येक खाता बीमा गरिएको हुन्छ । तर एउटै बैंकमा धेरै खाता छन् भने बीमा सुनिश्चित गर्न बित्तिय संस्थासँग कुरा गर्न आवश्यक छ ।
साथै २ लाख ५० हजार डलरसम्मको बीमाको सीमा प्रत्येक डिपोजिटकर्तामा लागू हुन्छ। यदि तपाइँको अर्को व्यक्तिसँग संयुक्त खाता छ भने तपाइँ दुवैलाई त्यो खाताको लागि ५ लाख डलरसम्मको बीमा गरिएको हुन्छ ।
यदि बैंक वा बित्तिय संस्था डुबेको खण्डमा पनि फेडरल डिपोजिट इन्स्योरेन्स कर्पोरेशनले तपाईको २ लाख ५० हजार डलरसम्मको रकम फिर्ता दिन्छ । तर यदि २ लाख ५० हजारभन्दा धेरै रकम छ भने धेरै मध्येको रकम तपाईले फिर्ता पाउने ग्यारेन्टी हुँदैन ।
यदि तपाईसँग २ लाख ५० हजारभन्दा धेरै रकम छ भने बैंक विफलताको घटनामा बीमा नगरिएको रकम गुमाउने जोखिमलाई कम गर्न तपाइँले धेरै बैंक वा बचत संस्थाहरूमा आफ्नो डिपोजिटहरु राख्न सक्नुहुन्छ ।
शुक्रबार अमेरिकामा असफल भएको सिलिकन भ्यालीको बैंकको डिपोटिजमा ८५ प्रतिशतभन्दा बढी रकम बीमा गरिएको थिएन। धेरै सिलिकन भ्याली स्टार्टअपहरूले बैंकमा लाखौं, वा सयौं मिलियन डलर जम्मा गरेका थिए । उनीहरुले यो रकम आफ्नो कम्पनीहरू चलाउन र कर्मचारीहरूलाई भुक्तानी गर्न प्रयोग गर्थे।