अमेरिकामा नेपालीको अन्तरराज्य स्तरीय भलिवल प्रतियोगिता हुँदै, ५५५५ डलर पुरस्कार
प्रकाशित मिति : चैत्र १७, २०७९ शुक्रबार
अमेरिकामा नेपालीको अन्तरराज्य स्तरीय भलिवल प्रतियोगिता हुने भएको छ । आगामी अप्रिल ८ र ९ मा मेरिल्याण्डको बाल्टिमोरमा हुने प्रतियोगिता पर्वत समाज अमेरिकाको आयोजनामा हुन लागेको हो ।
प्रतियोगितामा सहभागी हुनका लागि अहिलेसम्म दर्जन बढी टिमहरुले दर्ता गरिसकेका छन् भने दर्ता गर्ने अन्तिम म्याद अप्रिल २ सम्म रहेको छ ।
दर्ता शुल्क ५ सय डलर रहेको छ भने विजयी टिमले ५ हजार ५ सय ५५ डलरका साथमा ट्रफी र मेडलहरु प्राप्त गर्नेछ । दोश्रो हुने टिमले ३ हजार ३ सय ३३ डलरका साथमा ट्रफी र मेडलहरु प्राप्त गर्नेछ ।
पर्वत समाजले पहिलोपटक प्रतियोगिता गर्न लागेको र प्रतियोगितामा अहिलेसम्म १४ वटा टिमले दर्ता गरिसकेकाले आफूहरु निकै उत्साहित रहेका खेलकुद संयोजक मध्येका एक दामोदर पौडेलले खसोखासलाई जानकारी दिए । अर्का खेलकुद संयोजक राम श्रेष्ठ हुन् ।
प्रतियोगिता राष्ट्रिय सभाका अध्यक्ष गणेश प्रसाद तिमिल्सिनाको प्रमुख आतीथ्यमा हुने आयोजकले जानकारी दिएका छन् ।