अमेरिकाको तेश्रो ठूलो ८७५ मिलियनको पावरबल ज्याकपट शनिबार, मेगा मिलियन्स पनि सातौं ठूलो
प्रकाशित मिति : असार २८, २०८० बिहीबार
अमेरिकाको पावरबल ज्याकपट अब ८७५ मिलियन डलर पुगेको छ, जुन अहिलेसम्मकै सबैभन्दा तेश्रो ठूलो पावरबल ज्याकपट हो । कुनै पनि टिकटसँग बुधबार रातिका छवटा विजयी नम्बरहरूसँग मेल नखाएपछि शनिबार रातीको लागि तय गरिएको पावरबल ८७५ मिलियन पुगेको हो । विजेताले नगद लिन चाहेमा ४४१ मिलियन डलर प्राप्त गर्नेछन् । त्यसपछि ट्याक्स रकम पनि काटिनेछ ।
हालको ज्याकपट अप्रिलको मध्यदेखि बढ्दै गएको हो । ओहायोमा बेचेको टिकटले २५२ मिलियनको ज्याकपट जितेदेखि कसैले पनि सबै छवटा नम्बर मिलाएका छैनन् । अहिलेसम्म सबैभन्दा ठूलो पावरबल सन् २०२२ नोभेम्बर ७ मा २ दशमलव शुन्य ४ बिलियनको ज्याकपट क्यालिफोर्नियाका व्यक्तिले जितेका थिए भने दोश्रो ठूलो पावरबल सन् २०१६ को जनवरी १३ मा १ दशमलव ५ बिलियन डलरको ज्याकपट क्यालिफोर्निया, फ्लोरिडा र टेनेसीका व्यक्तिले जितेका थिए ।
पावरबल चिठ्ठा अमेरिकाका ४५ वटा राज्यहरुमा खेल्न सकिन्छ । साथै वासिंटन डिसी, पोर्तोरिको र युएस भर्जिन आइल्याण्डमा पनि खेल्न सकिन्छ । पावरबल लोटरी सोमबार, बुधबार र शनिबार न्युयोर्क समय अनुशार राती १० बजेर ५९ मिनेट जाँदा खोलिन्छ । यो टिकटको मूल्य २ डलर रहेको छ । खेल्ने व्यक्तिले १ देखि १ देखि ६९ सम्मका ५ वटा नम्बर र १ देखि २६ सम्मको एउटा नम्बर छनौट गर्नुपर्छ ।
त्यस्तै शुक्रबार खोलिने मेगा मिलियन्स पनि ५६० मिलियन डलर पुगेको छ । यो अमेरिकी इतिहासको सातौं ठूलो मेगा मिलियन ज्याकपट बनेको छ । मंगलबार रातिका सबै ६ नम्बरहरू कसैले पनि मिलाउन नसकेपछि अब यो ज्याकपट शुक्रबारखोलिने भएको हो । मेगा मिलियन चिठ्ठा अमेरिकाका ४४ वटा राज्यहरुमा खेल्न सकिन्छ । साथै वासिंटन डिसी र युएस भर्जिन आइल्याण्डमा पनि खेल्न सकिन्छ ।
मेगा मिलियन हरेक मंगलबार र शुक्रबार न्युयोर्क समय अनुशार राती ११ बजे खोलिन्छ । यो टिकटको मूल्य २ डलर रहेको छ । खेल्ने व्यक्तिले १ देखि ७० भित्रका ५ वटा नम्बर र १ देखि २५ भित्रको एउटा नम्बर छनौट गर्नुपर्छ ।