अमेरिकाबाट नेपाल घुम्न गएकी २२ वर्षीया अन्जिता भण्डारीको क्यानोनिङ दुर्घटनामा निधन
प्रकाशित मिति : श्रावण १३, २०८० शनिबार
नेपाल घुम्न गएको बेलामा कास्कीमा क्यानोनिङ गर्ने क्रममा लडेर अमेरिकाको मेरिल्याण्ड राज्यको बाल्टिमोर निवासी २२ वर्षीया अन्जिता भण्डारीको निधन भएको छ । नेपलिज डायस्पोराका अनुशार भण्डारीको माछापुच्छ्रे गाउँपालिका ९ घलेलमा हेको पोखरा क्यानोनमा क्यानोनिङ गर्ने क्रममा लडेर मृत्यु भएको हो ।
मेरिल्याण्डको एक युनिभर्सिटीबाट कम्प्युटर साईन्समा ब्याचलर सकेर छुट्टि मनाउन नेपाल गएकी अन्जिता क्यानोनिङ गर्नेक्रममा १ सय ४० फिट माथीबाट लडेकी थिईन । पोखरा २६ बुढी बजारमा रहेको पुर्ख्यौली घरमा छुट्टि बिताउन दिदीसँगै गएको बखत उनी क्यानोनिङका लागि गएकी थिइन् ।
झरनाबाट झर्ने क्रममा अचानक लडेर घाइते भएकी भण्डारीलाई उपचारका लागि माणिपाल अस्पताल लगिएको थियो । उनको उपचारका क्रममा बुधबार चिकित्सकले मृत घोषणा गरेका थिए । अन्जिताको पोखराको रामघाटमा अन्त्येष्टी गरिसकिएको छ ।
अन्जिताको दुर्घटनाको खबर पाएपछि अमेरिकामा रहेका बुबाआमा नेपाल गईसकेका छन् । सामाजिक अभियन्ता समेत रहेका उनका बुवा तिर्थ भन्डारी सन २०११ देखि अमेरिका बस्दै आएका छन् भने अन्जिता सन् २०१७ मा आमा, दिदी र भाईका साथमा अमेरिका आएकी थिइन् ।
अन्जिता अत्यन्तै मिलनशार, स्मार्ट र सहयोगी रहेको बताउँदै मेरिल्याण्डका राज्य सांसद ह्यारी भण्डारीले मृतकप्रति श्रद्धाञ्जली व्यक्त गरेका छन् । उनले शोकाकुल परिवारप्रति समवेदना व्यक्त गर्दै भने – ‘यो अत्यन्तै दुखद खबर हो । उनले मेरो चुनावी अभियानमा पनि स्वंसेवकका रुपमा खटिएकी थिइन् । सामाजिक कामहरुमा सहभागी हुन रुचाउने उनी अत्यन्तै सहयोगी भावनाकी थिइन् । उनी अत्यन्तै जिज्ञासु समेत थिइन् ।’